Khasaare nafeed iyo mid hantiyeed oo lixaad leh ayaa la soo sheegayaa iney geysteen daadad xoogan oo ku dhuftay gobolo ka tirsan bariga wadanka Shiinaha.

Wakaaladda Wararka ee Xinhua ayaa soo werisay in daadadka ay qaadeen in ka badan 52 kun oo Guri, iyagoo sidoo kale sababay dhiiqo guur, waxaana hoos u go’ay qeybo ka mid ah dhulka.

Dad ka badan 300 oo kun ayaa la sheegay in laga daad gureeyey gobolada ay saameeyeen roobabkan daadadka wata oo lagu tilmaamay kuwii ugu khasaaraha badnaa ee ka dhaca dalka Shiinaha sanadahan.

Xukuumada China ayaa sheegtay inay gurmad deg deg ah oo gaaraya 15 milyan dollar oo fidisay dadka waxyeeladu ka soo gaartay daadadkaasi, waxaana ku baxay shaqaale gargaar oo wata doonyo, iyadoo meelaha qaar lagu guul-dareystay in la gaaro.

Daadadka ayaa waxaa sidoo kale la soo sheegayaa iney baabi’yeen dhul beereed ku fadhiyay 700 oo kun oo Hiktar, kuwaasoo isku bedelay dhul biyuhu ay dul sabeynayaan.

Khasaaraha maaliyadeed ee ka dhashay roobabkan daadadka wata ayaa lagu qiyaasay in ka badan 204 Bilyan oo dollar, waxaana khubarada dhibaatooyinkan oo kale qiimeeya ay sheegayaan iney sabado badan qaadan doonto soo kabashada dadka ay daadadkan saameeyeen.