"Wasaaradda Arrimaha Gudaha waxay jufo walba ka qorteen Nabadoon iyo odayaalo faalso ah, waxayna maalmahan ku mashquulsan tahay inay kaarar aqoonsi ah siiso, waxaa la rabaa in doorashada lagu musuq maasuqo,qof iyo cod waa la diiday, odayaasha saxda ahaa waa lagu kalsoonaan waayay, waqtigii saxda ahaa wax waa la qaban waayay, xagee loo socdaa”ayuu yiri Axmed Macalin Fiqi.

Mr Fiqi ayaa sheegay in markii laga tashan lahaa siyaasada oo dadka ay xog heli lahaayeen ay soo baxday warqad ka timid Wasaaradda Amniga oo lagu joojinayo kulamada wada tashiyada ee Hotelada lagu qabanayo, isagoo soo qaatay kulan ay todobaadkii hore yeelan lahaayeen odayaal dhaqameedyo oo Laamaha ammaanka is hor-taageen.

"Waxaa socota anaga hadaan nala dooraneyn, dalkan meeshuu rabo haka baxo, Madaxweyanaha waa musharax, Ra’iisul Wasaaraha waa musharax iyo Guddoomiyaha Baarlamaanka isagana waa musharax, waxay rabaan rabitaankooda inay nagu hagaan”ayuu mar kale yiri Axmed Macalin Fiqi.

Sidoo kale Axmed Fiqi ayaa sheegay inay dacwad u gudbinayaan Maxkamadda sare, isla markaana amarada ka soo baxay Wasaaradda Amniga ee lagu joojinayo kulamada siyaasadeed ay yihiin kuwo aan sharci aheyn.

Dhamaadka sanadkan ayaa waxaa lagu wadaa in doorashooyin ka dhacaan dalka, iyadoo ay xilka Madaxweynaha ay isku soo sharaxeen Musharaxiin fara badan, kuwaasoo olole siyaasadeed ka wada gudaha dalka iyo dibadiisa.

xigasho:-jowhar.com