Korneyl Maxamed Xasan Faarax, Taliyaha Hay’adda Nabad Suggida Gobolka Banaadir, ayaa raggaasi ku eedeeyay in magaca Hay’adda Nabad Suggida ay dadka ku dhici jireen.

Cabdi Mahad Axmed (Sangaab), Gudoomiyaha Waaxda Luulyo ee Degmada Yaaqshiid, ayaa dhinaciisa sheegay in ragga la qabtay ay iska soo abaabuli jireen dhisme ku yaala xaafadaasi.

Waxaa uu cadeeyay in dembiilayaasha ay falalka dhaca u adeegsadeen qoryo, bistoolado, mindiyo iyo wixii lamid ah, waxaase uu mahdiyay in qaarkood gacanta lagu soo dhigay.

C/fitaax Cumar Xalane, Afhayeenka Maamulka Gobolka Banaadir, ayaa waxaa uu xubnaha la qabtay uu ku eedeeyay inay yihiin kuwo xumeynaya magaca dhalinta soo koreysa.

Xalane waxaa uu bulshada deegaanka uu kaga mahadceliyay doorkooda ku aadan tallaabada lagu soo qabtay labada nin, oo hadda sida uu sheegay u xiran sharciga, lana horkeeni doono cadaaladda, si loogu qaado waxa ay ka qabto falalkii ay ku hawlanaayeen.

Goobta lagu soo bandhigay labada nin, ayaa sidoo kale lagu soo bandhigay agabyo fara-badan oo la sheegay inay ka dhaceen dadka rayidka ah, iyadoo wax ay u kala dhaafayaan aanay jirin. Sida teleefanada gacanta, computero, kaamirooyin, lacag, baasabooro, ID-yada aqoonsiga, shahaadooyin iyo wax kasta oo ay dadku haystaan.