Wasiirka cusub ee Wasaaradda waxbarashada Dowladda Federaalka Soomaaliya Dr. C/qaadir Cabdi Xaashi ayaa maanta daboolka ka qaaday qorshaha ugu horeeya ee ay wasaaradiisu ku dhaqaaqeyso, kaddib markii uu ka qeyb galay munaasabad waxbarashada dadban dalka looga hirgelinayo.

"Waxaan horumarin doonaa waxbarashada dadban ee gabdhaha aan helin waxbarashada caadiga ah” ayuu yiri Dr. C/qaadir Cabdi Xaashi oo sheegay in howshu tahay mid bilow ah isla markaana ay jiraan gabdho kale.

Dhinaca kale waxa uu sheegay Wasiir Xaashi in barnaamijkan uu la mid yahay ololihii waxbarashada reer miyiga, inkasta oo aanu sheegin in barnaamijkaan ay geynayaan gobolada dalka.

Guddoomiyaha ururka Haweenka Qaranka Batuulo Sheekh Axmed Gaballe ayaa sheegtay inay soo dhoweynayaan tallaabada Dowladda ku caawineyso gabdhaha aan helin fursadaha waxbarasho ee dalka, iyadoona sheegtay inay ka faa’iideysan doonaan gabdhaha ay u soo xuleen ka faa’iideysiga waxbarashada dadban.