Sida ay ogaatay Caasimada Online waxa aan shaqeyn go'aankii ay dowladda federaalka Soomaaliya ay ku amartay in lagu xiro qunsuliyadaha Itoobiya ay ku leedahay magaalooyinka Hargeysa iyo Garoowe. Amarka xirista qunsuliyadaha Itoobiya ayaa Golaha Wasiirrada Soomaaliya waxay soo saareen 4-tii bishaan, ayada oo uu ku ekaa Khamiistii shalay, welina dhaqan-gal ma noqon amarkaasi. Labada qunsuliyadood ayaa si caadi ah u shaqeynaya haatan, ayada oo aysan jirin wax saameyn ah oo uu ku yeeshay amarka kasoo baxay dowladda fedaraalka Soomaaliya, sida ay Caasimada Online u xaqiijiyeen illo-wareedyo muhiim ah. Go'aanka dowladda federaalka ayaa waxaa horey gaashanka ugu daruuray Somaliland iyo Puntland oo ayagu sheegay in go'aannada dowladda federaalka aanu ka shaqeyn deegaanadooda. Labada maamul ayaa mid walba gaarkiisa ugu faanay inuu xiriir saaxiibtinimo iyo mid ganacsi uu la leeyahay Itoobiya, oo xilligaan ay xiisad xooggan kala dhaxeyso dowladda federaalka Soomaaliya, taasi oo salka ku haysa damaca guracan ee badda. Dowladda federaalka ayaa si weyn uga carootay tallaabooyinka isxig-xiga ee Itoobiya ee xad-gudubka ku ah madax-banaanida Soomaaliya, oo ay ugu dambeysay heshiiskii ay dhawaan Addis Ababa ku gaareen maamulka Puntland iyo xukuumadda Abiy. Sidoo kale waxaa kasii horeeyay heshiiskii is-afgarad ee Itoobiya ay la saxiixatay Somaliland, kaasi oo Muuse Biixi uu qeybo kamid ah biyaha Soomaaliya uga beddelanayay Addis Ababa wax loogu yeeray "ictiraaf", kaasi oo la kulmay diidmo horleh oo caalami ah. Si kastaba, go'aankii todobaadkii hore kasoo baxay Golaha Wasiirrada Soomaaliya ayay dowladda ku sheegtay "in haddii uu dhaqan-gali waayo inay qaadayso tallaabo kasta oo ay ku ilaalinayso madax-banaanideeda dhuleed."