Boqolaal Ruux Oo Lagu Diley Gobolka Zamfara Dalka Nigeria
Dableyda weerarka geysatay ayaa gubtay guryo, sidoo kalena waxay googooyeen meydadka dadka ay dileen.
Mid ka mid ah dadka deggan tuulooyinkaas ayaa wakaaladda wararka ee Reuters u sheegay in dableydu ay tooganayeen qof kasta oo la arko.
Weeraradan ayaa ah kuwii ugu dambeeyay ee mowjado rabshado wata oo ka dhacay waqooyi-galbeed Nigeria, halkaasoo dowladda dhexe ay muddo dheer dagaal kula jirtay kooxo dambiilayaal ah oo maxalli ah oo ay ku tilmaantay burcad.
Jimcihii ayaa markii hore la sheegay in in ka badan 100 qof ay ku dileen dabley looga shakisan yahay burcada gobolka, ka dib markii ilaa 300 oo dabley ah oo wata mooto bajaaj ay soo gaareen ilaa sagaal beelood intii u dhaxeysay Talaadadii iyo habeenkii Khamiista.
Idi Musa, oo degan tuulo kale, ayaa wakaaladda wararka ee AFP u sheegay in kooxda weerarka geysatay ay sidoo kale dhaceen ku dhawaad ​​2,000 oo lo’ ah.
Dhanka kale, warbaahinta gudaha ayaa sheegtay in kooxaha hubeysan ay u muuqdaan inay isaga tagayaan meelaha ay ku dhuumaaleysanayaan dhulka keymaha ah, si ay uga jawaabaan weerarada joogtada ah ee dowladda, taa badalkeedana ay u dhaqaaqaan dhanka galbeed ee gobolka Zamfara.
Bayaan uu soo saaray Sabtidii shalay, madaxweynaha Nigeria Muhammadu Buhari ayaa ballan qaaday in dowladdu aysan ka hari doonin dagaalka ay kula jirto kooxaha hubeysan.
Arbacadii, dowladda Nigeria ayaa si rasmi ah ugu tilmaantay burcadda argagixiso, taasoo u ogolaatay ciidamada ammaanka inay cunaqabatayn adag ku soo rogaan kooxaha iyo taageerayaashooda.
Ciidamada Nigeria ayaa todobaadkan sheegay inay gobolka ku dileen 537 burcad hubaysan iyo kuwo kale oo dambiilayaal ah waxayna xireen 374 kale tan iyo bishii May ee sanadkii hore.
Boqolaal Ruux Oo Lagu Diley Gobolka Zamfara Dalka Nigeria
...