Kabtanka Paris Saint-Germain Thiago Silva ayaa aaminsan in Zlatan Ibrahimovic uu hal talaabo hoos u soo degi doono haddii uu u wareego horyaalka Premier League.

Ibrahimovic ayaa qandaraaskiisa kooxda ka dhisan caasimada Faransiiska waxa uu ku eg yahay xagaaga, waxaana si weyn u doonaya 34 jirkaan gooldhaliyaha ah dhamaan kooxaha waa weyn ee dalka Ingariiska.

Kooxda Faransiiska ayaa soo gaartay magaalada Manchester shalayto iyagoo durbaba soo xaqiijistay hanashada horyaalka France, islamarkaana hamigooda uu haatan yahay inay meel dheer ka gaaraan Champions League.

Daafaca reer Brazil Silva ayaa aaminsan in PSG ay ka fiican tahay haatan koox kasta oo ka ciyaareysa Premier League.

Waxa uu yiri: "Zlatan waa saaxiib aan isku fiicanahay, laakiin sidoo kale isagoo 34 sanno jir ah waxa uu ciyaarayaa kubadiisii ugu fiicneyd waayihiisa ciyaareed. Waa mid ka mid ah xiddigaha ugu fiican dunida, waa nin qariib ah, ma jiro ciyaaryahan isaga la mid ah.

"Dabcan waxaan doonayaa inuu sii joogo PSG, ma qiyaasi karo anagoo uu inaga maqan yahay isaga.

"Waan ogahay inuu dalabyo ka helayo England waana horyaal weyn, laakiin uma maleynayo inay jirto koox England ka dhisan oo ku heer ah PSG waqtigaan. Aniga ahaan waxa ay ila tahay inay hoos u dhac u tahay isaga inuu halkaas aado.”