Warar dheeraad ah ayaa kasoo baxaya koox hubeysan oo xalay gudaha degmada Wadajir ee Gobolkaan Banaadir ku dilay Sarkaal ka tirsan Ciidanka kumaandooska Gorgor ee Xoogga dalka Soomaaliya.

     Dad ayaa waxaa ay ku warrameen in Sarkaalka ay toogasho ku dileen rag ku hubeysnaa Bastoolado, xili uu kusii jeeday hoygiisa oo ku yaalla xaafad ka tirsan Wadajir, isagoona u geeriyooday rasaas ku dhacday.

     Sarkaalka la toogtay ayaa waxaa lagu magacaabi jiray Maxamed Cali Yarami, isla markaana waxaa uu kamid ahaa Ciidanka kumaandooska Gorgor ee Xoogga dalka Soomaaliya ee dalka Turkiga lagu soo tababaray.

   mana jiro wax war ah oo kasoo baxay laammaha amniga DFS oo ay uga hadlayaan dilkii xalay gudaha degmada Wadajir Gobolka Banaadir loogu geystay Maxamed Cali Yarami oo ka tirsanaa Ciidanka Gorgor.

      Magaalada Muqdisho ee Caasimadda dalka ayaa waxaa xiliyada qaarkood ka dhaca dilal qorsheysan oo geystaan rag ku hubeysan bastoolado, waxaana inta badan falalkaas dilalka ah  sheegta Xarrakada  Al-shabaab