Sir Alex Ferguson ayaa u sheegay jamaahiirta Manchester City inay iska ilaawaan inay noqonayaan Barcelona-da cusub.

Rajo aad u sareysa ayaa ka jirta Etihad Stadium iyo waxa ay kasban karaan marka uu tababarahooda cusub Pep Guardiola yimaado xagaaga.

Waxa uu qeyb ka ahaa kooxdii Barcelona ee abid ugu guulaha badneyd isagoo u qaaday seddex koob oo La Liga ah iyo labo koob oo Champions League ah.

Laakiin Ferguson ayaa yiri: "Man City waxa ay sameysay afduub rasmi ah oo ay ku heshay isaga laakiin Pep shaqada uma sahlanaan doonto, kubada cagta Ingariiska ma ahan mid sahlan.

"Tababare kasta oo ajnabi ah oo yimid England ayaana ku sheegaya sidaas.

"Pep waa uu najixi doonaa laakiin uma maleynayo inuu abidna ku celin doono wixii uu ku sameeyay Barcelona sababtoo ah waxa ay aheyd heerkii ugu sareysay, waxa ay ahaayeen kuwii ugu fiicnaa.

"Pep waa uu horumarin doonaa City laakiin Arsenal, Liverpool, Chelsea, Tottenham iyagana waxbeey sameyn doonaa, waxaana ay hamiyi doonaan si la mid ah City hanashada horyaalka, sidaasi darteed imaanshiyaha Pep ma xaqiijineyso ku guuleysiga horyaalka.”