Milatariga Itoobiya ayaa xabsiga u taxaabay weriya ka tirsan BBC-da oo ku sugnaa gobolka ay colaaduhu ka socdaan ee waqooyiga ku yaalla ee Tigray. Girmay Gebru, oo u shaqeeya laanta Tigranya ee BBC-da ayaa laga qabtay makhaayad ku taalla caasimadda gobolkaasi ee Mekelle. Afar qof oo kale ayaa lala xiray. Goobjoogayaal ayaa sheegay in rag ku lebbisan dharka milatariga ay kaxeysteen shantaasi qof. Ma cadda sababta loo xiray raggaasi. BBC-da ayaa heshay warar sheegaya in raggaasi loo qaaday xero milatari oo ku taalla Mekelle. Gobolka Tigray waxaa gacanta ku hayay milatariga tan iyo bishii Nofeembar kaddib markii uu Ra'iisal wasaare Abiy Axmed amray in milatariga ay xukunka ka tuuraan kooxda TPLF ee maamulayay gobolkaasi.