Abuukar Ibraahim ayaa haraad iyo gaajo u dilay gabar uu dhalay oo lagu magacaabi jiray Fa’isa, ka dib markii uu saddex maalmood qol ku soo xiray.

Aabahan ayaa la sheegay inuu ka carooday is qabqabsi soo kala dhexgalay haweeney uu qabay iyo gabadhiisa. Haweeneydan ayaana ahayn hooyada dhashay gabadhaasi.

Dadka deegaanka ayaa sheegay in saddex maalmood ay iyadoo xir xiran Fa’isa ku jirtay qol uu aabaheyd ku xiray, iyadoona ku dhex geeriyootay qolkaasi. Fa’isa waxay ahayd afar iyo toban jir, sida ay hooyadeed sheegtay.Mariin Maxamed Cumar Caddow oo ah hooyada dhashay marxuumadda ayaa waxay dalbatay in cadaalad ay hesho gabadheeda, iyadoo dilkeedana dusha kaga tuurtay aabaheyd oo ay kala taggeen iyo xaaska uu iminka qabay, oo gabadheedana ay la noolleyd.

Saraakiisha laamaha ammaanka ee Degmada Buurhabaka ayaa laga soo xigtay inay gacanta ku hayaan kiiskaasi, dhawaana ay maxkamad soo taaggi doonaan ciddii dilka gabadha ka dambeysay.

Dhacdadan ayaa dareen argagax leh ku abuurtay dadka deegaanka, waxayna noqotay midda loogu hadalhaynta badan yahay Buurhakaba.

XIGASHO:-DHACDO.COM