Goobjoogaha labaad waa Xoghayaha Guud ee Ururka Saxafiyiinta Soomaaliyeed, Wariye Maxamed Ibraahim Macalimuu, oo isagu sheegay in shan iyo toban daqiiqo ka hor qaraxaasi uu goobta tagay.

           Xoghayaha ayaa VOA u sheegay in uu la socday gaariga Cabdirisaaq Cabdi oo ka tirsan sida uu sheegay Wasaaradda Warfaafinta, isla-markaana uu qaraxu dhacay, xilli ay wada sheekeysanayeen, markaasina ay isagii ugu war dambeysay. Ka dib markii uu qaraxu dhacay ayuu sheegay in xaaladda goobta isu bedeshay mid isku dhex yaacsan. Waxa uu intaa ku daray in uu u cararay dhinaca badda, ka dib markii uu ogaaday halka ay ka dhacayaan xabado xoog leh, oo sida uu sheegay daba socday qaraxaasi.

            Maxamed Ibraahim Macalimuu ayaa xusay inuu iska siibay funaanad cagaar cagaaran oo markaasi uu xirnaa, si aysan kuwii wax tooganaayay ugu fududaan inay soo toogtaan, midabka funaanadda awgeed.

Wariye Macalimuu ayaa dhacdadaan ku tilmaamay masiibo aad u xun, wuxuuna yiri "Waxay ahayd masiibo aad u xun, Ilaahayna intii umad ah ha badbaadiyo, welina meeshii xabad uun baa laga maqlayaa, laakiin ciidamo fara-badan ayaa na dhaafay oo meeshii nooga gudbay oo tagaaya, wax badan lagama ogaan karo hadda.”

               Ururka Al Shabaab ayaa goor dambe sheegtay masuuliyadda weerarka hubeysan, ee gelinkii dambe ee maanta lagu qaaday Hotel Elite, oo ku yaala Xeebta Liido ee Degmada Cabdicasiis.

War ka soo baxay Al Shabaab ayaa lagu muujiyay in bartilmaameedku uu ahaa Hotel Elite, oo uu leeyahay Xildhibaan Cabdullaahi Maxamed Nuur, oo ka tirsan Xildhibaanada Golaha Shacabka. Xildhibaanka ayaa ka mid ahaa dadkii ku go’doonsanaa hotelka ee qaarkood la soo badbaadiyay.

             Weerarkan oo noqonaya kiisii ugu horeeyay ee sanadkan lagu qaado hotel ku yaala Caasimadda Muqdisho ayaa waxaa ku dhintay shan iyo toban qof, halka sideed iyo tobaan kalana ay ku dhaawacantay. Khasaaraha ayaa loo maleynaya inuu intaasi ka badan yahay.

Xeebta Liido ayaa ka mid ah goobaha ugu badan ee dadka reer Muqdisho isagu yimaadaan, iyadoo ay dadku isaga kala yimaadaan toddobo iyo tobanka degmo ee Gobolka Banaadir.

Hotel Elite ee Muqdisho oo la weeraray