Qarax jugtiisa si weyn looga maqlay qaybo badan oo ka mid ah xaafadaha Magaalada Muqdisho ayaa fiidnimadii caawa ka dhacay Bartamaha Magaalada Muqdisho. Qaraxa oo loo maleynayo in loo adeegsaday gaari walxaha qarxa laga soo buuxiyay ayaa ka dhacay Isgoyska Taleex ee Degmada Hodan, gaar ahaan afaafka hore ee maqaaxida Creams.

Maqaaxidan ayaa waxay ku garab taallaa maqaaxi kaloo lagu magacaabo Last Coffee, waana maqaaxiyado kafeyga laga cabo, lagana helo cunooyinka fud fudud.

Qaraxan ayaa mar qura goobta gilgilay, xilli dad fara-badan ay ku fiidsanayeen labadaasi maqaaxi, waxaana goobtii quruxda badneyd uu u bedelay mid aad ka argagaxeyso.

Wariye-yaasha ayaa soo sheegaya in Ciidamada Booliska ay gaareen goobtaasi, isla-markaana aaggaasi laga maqlaayo dhawaqa gaadiidka gurmadka deg-degga ee Ambulance.