Uganda ayaa xustay sannad-guuradii 10aad ee ka soo wareegtay qaraxii 11-kii Luulyo, 2010 ee ka dhacay caasimadda Kampala ee ay ku dhinteen 76 taageerayaal kubadda cagta ah tobaneeyo kalena ay ku dhaawacmeen. Ururka Al-shabaab ayaa ka dambeeyay weerarkaan oo lala bartilmaameesaday goobo lagu daawanayay koobkii adduunka sanadkii 2010. Patrick Onyango, oo ah afayeenka booliska magaalada caasimada ah ee Kampala ayaa u sheegay wakaaladda wararka ee Xinhua in xuskaasi la qabtay xilli amniga aad loo adkeeyay. "Had iyo jeer waxaan kor u qaadnaa amnigayaga inta lagu jiro bisha Luulyo sababta oo ah waxaan ognahay in argagaxisadu ay sida caadiga ah rabaan inay dadka xasuusiyaan wixii ay sameeyeen sanadihii hore, "ayuu yiri Onyango. Qorshayaal lagu doonayay in orod labo geesood ah lagu qabto goobtii uu ka dhacay weerarka ayaa la joojiyay iyada oo dalku uu ku dhaqaaqayo tallaabooyin jahawareersan si loo joojiyo fiditaanka COVID-19. Kooxda al-Shabaab, ayaa weerarkaas ku tilmamtay aargudasho ka dhan ah ciidamada Uganda ee nabad ilaalinta ujooga Soomaaliya. Uganda ayaa bixisa tirada ugu badan ee ciidamada nabad ilaalinta Midowga Afrika ee jooga Soomaaliya, iyadoo in ka badan 6,000 oo ciidan ah geeysay dalka Soomaaliya. Onyango wuxuu sheegay in booliiska iyo hayadaha amaanka ay ku guuleysteen la dagaalanka argagixisada bariga afrika.