Dabley hubaysan ayaa Degmada Dharkiinley ee Gobolka Banaadir waxa ay saakay ku dileen Sarkaal ka tirsanaa Ciidamada Dowladda Federalka Somaliya. Sarkaalkaan ayaa la sheegay inuu ka tirsanaa Ciidamada Militariga Somaliya, waxaana darajadiisa aheyd laba Xidigle, sida saraakiisha Booliska qaarkood xaqiijiyeen.

            

               Allaha u naxariistee Marxuumka ayaa waxaa lagu magacaabi jiray Cali Raage Maxamuud, waxaana uu u dhintay rasaas dableyda ay ku fureen.

Ciidamada Booliska Saldhiga Degmada Dharkiinley ayaa goobta ka soo qaaday maydka Marxuumka, waxaana halkaasi ka baxsaday dableydii dilka gaysatay.

           Shabaab ayaa sheegtay masuuliyadda dilkaan, waxaana ay sheegeen amniyaadkooda inay beegsadeen Sarkaal ka tirsanaa Ciidamada Dowladda Somaliya, waxaa kale oo Shabaab ay sheegteen askari kale inay ku dileen xaafadda Suuqa Xoolaha ee Degmada Heliwaa.