Wararka naga soo gaaraya duleedka magaalada caasimada ah ee Muqdisho, gaar ahaan isgoyska EX-Control Afgooye ayaa sheegaya in goor dhow lagu dilay wade mooto Bajaajle ahaa oo marayey halkaasi.

Dilka ayaa waxaa geystay askari ka tirsan ciidamada dowladda oo ku sugnaa agagaarka xerunta Asluubta oo ku dhow isgoyskaasi.

Goobjooge ayaa u sheegay Warbaahinta in marxuumka uu ku dhintay isla goobta, kadib markii ay rasaasta uu furay askariga ka haleeshay qeybaha sare ee jirkiisa.

Sidoo kale waxaa goobta ku sugnaa ciidamo kale oo ka tirsan kuwa dowladda oo ku mashquulsanaa furista waddada oo uu xilligaasi ka jiray jaam xoogan.

Inta badan ciidamada dowladda ayaa dilal u geysta dhalinyarada kaxeysa mootooyinka Bajaaj-ta ee ka shaqeysa M/ Muqdisho, waxaana marar badan darawalladaasi ay banaanbaxyo cabasho ah ka dhigeen degmooyin ka tirsan gobolka Banaadir