Usain Boltayaa ku qoslay sheegashada aheyd in daafaca kooxda Arsenal Hector Bellerin inuu ku garaaci karo tartan orod ah. Warbixin ay qortay BBC sannadkii hore ayaa sheegeysay in Bellerin uu ka orod badan yahay ninka lixda jeer bilada dahabka ku guuleystay ciyaaraha Olimbikada 40ka mitir ee ugu horeeya.

Waxaa la sheegay in marka uu Bellerin xawaaraha ugu sareeya ku ordayo inuu 40 mitir ku ordi karo 4.41 ilbirisi waana waqti ka dhakhso badan intii uu Bolt ku gaaray 40 mitir markii uu dhigayay rikoorkii adduunka ee orodyahanka ugu dheereeya caalamka ee 100ka mitir sannadii 2009.

Markii istaatistikadaan loo sheegay Bellerin bishii November waxa uu qirtay inuusan dooneynin inuu tartan orod ah la galo ninka reer Jamaica.

"Waa orodyahan dheereeya, sida iska cadna waa ninka ugu dheereeya caalamka” ayuu yiri daafaca reer Spain.

"Waxaan arkay dad sheegaya inaan ka orod badanahay isaga, laakiin mar walba waa ay ka duwan tahay marka ay kubada cagtaada ku jirto.

"Waana taas waxa ay shaqadeyda tahay, iskuma dayi doono inaan orod ku garaaco isaga.”

Bolt oo isku diyaarinaya ciyaaraha Olimbikada ee Rio ee xagaagan ayaa warbixinta BBC ka hadlay: "Sheekooyinkaan waxa ay iga keenaan inaan qoslo.”

Isagoo u hadlayay Eurosport waxa uu hadalkiisa raaciyay: "Ciyaartoyda kubada cagta waxa ay orod badan yihiin 10 ilaa 20ka ilbiriqsi ee ugu horeeya, waana taas waxa ay tababar ku sameeyaan. Waxaan tababar ku sameeyaa inaan orod bato in ka badan 100 mitir ama 200 mitir.”