Kooxda Barcelona ayaa shalayto sii dheereysatay hogaanka horyaalka La Liga iyagoo 9 dhibcood haatan kaga yahay kooxda Atletico Madrid oo maanta ciyaareysa iyo 10 dhibcood oo ay ka sareeyaan kooxda Real Madrid ka dib markii ay 2-1 kaga badiyeen, laakiin saxaafada Spain ayaa qoreysa in dhismaha goolkii guusha ee Neymar in Suarez uu offside ku jiray.

Iyadoo ciyaartii u dhaxeysay Las Palmas iyo Barcelona ay mareysay barbaro 1-1 ah, Neymar ayaa kooxda Los Azulgranas u dhaliyay goolka guusha isagoo meel dhow shabaqa ka toogtay markii goolhaye Javi Vars uu badbaadiyay isku daygii koowaad ee Lionel Messi.

Si kastaba, sida ay qortay jariirada Isbaanishka ee AS ku celiskii la daawaday ayaa muujinaya in goolka xiddiga reer Brazil uu dhaliyay daqiiqadii 38aad inay aheyd in la diido: Luis Suarez oo soo dhigay kubada garooska ee goolka ayaa offside ku jiray markii ugu horeysay ee uu kubada helayay.

Sida aad ka dheehan karto sawirka kore, Suarez ayaa ka yara horeeya daafaca Las Palmas waxaana uu kubada la aaday dhanka kooner ka hor inta uusan gudaha soo gelin isagoo u dhigay Messi kaasoo darbadiisa uu badbaadiyay goolhaye Javi Varas balse waxaa ku celiyay oo dhaliyay Neymar.