Tababar ku saabsan manhajka cusub ee waxbarashada dalka oo loo qabanayay macallimiinta wax ka dhiga iskuulada dalka ayaa shalay lagu soo gabagabeeyay magaalada Muqdisho. Tababarkan oo ay ka qeyb galayeen ku dhowaad 150 macallin oo wax ka dhiga iskuulada magaalada Muqdisho ayaa hadafkiisu ahaa in macalimiinta lagu tababaro habka ugu wanaagsan ee ay ardayda u gaarsiin karaan manhajka cusub. Wasiiru dowlaha Wasaaradda waxbrashada Dowladda Soomaliya Cabdiraxmaan Cabdulle Jaabiri ayaa sheegay in dhankooda ay ka go'antahay dhaqan gelinta manhajka cusub macna weynna ay u leedahay in ardayda Soomaaliyeed loo dhigo manhaj ka turjumaya Soomaalinnimadooda. Maxamed Xasan Aadan oo ka mid ah mas'uuliyiintii Wasaaradda ee ka shaqeynayay howlaha tababarkan ayaa sheegay in manhajkan cusub uu ku dhisan yahay laba tiir oo kala ah islaamnimo iyo Soomaalinnimo, isla markaana ay rejeynayaan in dalka dhan la gaarsiiyo.