Xiddiga khadka dhexe ee kooxda Chelsea Ramires ayaa ku dhow inuu 25 milyan ginni heshiis ah ugu dhaqaaqo kooxda China ka dhisan ee Juangsu Suning sida saxaafada kubada cagta ay inteeda badan baahinayaan maanta.

28 jirkaan khadka dhexe ee reer Brazil ayaa Chelsea kaga soo biiray kooxda Benfica isagoo ku soo wareegay heshiis 17 milyan ginni ahaa sannadii 2010 waxaana uu ogolaaday heshiis cusub oo afar sanno ah bishii October ee sannadkii hore laakiin waxa uu ku soo bilowday kaliya todobo kulan oo Premier League ah xilli ciyaareedkan.

Jiangsu ayaa kaalinta sagaalaad kaga dhameysatay horyaalka heerka koowaad ee China sannadkii hore, waxaana tababare u ah daaficii hore ee Chelsea Dan Petrescu.

Kulankiisii ugu danbeysay ee uu u ciyaaro Chelsea waxa ay aheyd kulankii ay 2-0 kaga badiyeen Scunthorpe ee FA Cup horaantii bishaan, welina kama soo muuqan kulan Premier League ah tan iyo kulankii barbaraha goolal la’aanta ah ku dhamaaday ee ay la galeen Manchester United 28kii bishii December.

Ramires ayaa ka caawiyay Blues inay ku guuleystaan Premier League, Fa Cup, League Cup, Champions League iyo Europa League.

Xiddigii hore ee khadka dhexe Tottenham ahna xiddig kale oo Brazil ah Paulinho ayaa haatan ka ciyaaraya China iyadoo uu macalin u yahay macalinkii hore ee Chelsea Felipe Scolari kooxda Guangzhou Evergrande.