Diego Costa ayaa nabar uu ka soo gaaray laf dheerta intii uu socday kulankii ay barbaraha sabtidii la galeen kooxda Everton laakiin waxaa la sugayaa ilaa iyo inta uu weeraryahanka Chelsea maqnaan karo.

Costa ayaa loo diray inuu raajo saaro laf dheertiisa ka dib markii uu ka tagay Stamford Bridge, waxaana Press Association Sport ay fahamsan tahay in natiijada baaritanaka ay muujisay inuusan jirin wax jab ah ama jeex ah kaliya ay aheyd jug xoogan soo gaartay.

27 jirka reer Brazil balse dhalashada ka qaatay Spain ayaa daweyn u yimid garoonka tababarka Chelsea shalayto, inkastoo kooxda inteeda kale uu tababare Guus Hiddink siiyay fasax labo maalmood ah.

Costa ayaa dhaliyay goolkii hore ee Chelsea iyadoo Blues ay ka soo kabsatay 2-0 hogaanka looga hayay iyagoo barbaro 2-2 ah ka dhigay, waxaana ay ciyaarta ku soo dhamaatay 3-3 markii John Terry uu waqtigii dhimashada gool ka dhaliyay Everton.