Xiddiga reer Brazil ayaa 26-jirsaday, wuxuuna qorsheeyay inuu dhalashadiisa u dabaal dago 3-habeen oo xiriir ah, axad, isniin iyo talaado.

Sida uu baahiyay Sport, Neymar ayaa casuumaad u fidiyay asxaabtiisii hore ee Barcelona si ay uga qayb qaataan xaflada dhalashadiisa laakiin sidii uu rabay ma dhicin.

Axadii Barcelona ayaa la ciyaartay kooxda Espanyol kulan adag, kooxda ayaana lagu celiyay barbaro 1-1 ah, suurogalna ma ahayn in ciyaartoyda ay u safraan Paris isla waqtigaas.

Sidoo kale, ciyaartoyda Barcelona ayaa isniintii sameeyay tababarka ay ugu diyaar garoobayaan kulanka lugta labaad ee Copa del Rey, sidaas darteed ayeey u seegeen xafladii labaad ee xalay la dhigay.

Messi, Suarez, Pique iyo Coutinho ayaa u diyaar garoobayay inay maanta u safraan Paris si ay uga qayb galaan xaflada ugu danbaysa oo dhacaysa caawa, laakiin nasiib xumo diyaaradii ay ku qornaayeen ayaa baaqatay kadib markii la sheegay in cimiladu ay xunyihiin diyaaraduna ay adagtahay inay baxdo.

Dhamaan ciyaartoydaan ayaa saaxiibo dhaw la ah Neymar inkasta oo uu ka tagay Barcelona suuqii xaggaaga.