Xulka qaranka Morocco ayaa 2-0 ugu awood sheegtay xulka qarankaCôte d’Ivoire ama Ivory Coast hadba sida aad u taaqaan waxayna Morocco ka mid noqotay qaramada Afrika ee koobka aduunka ka ciyaari doona isla markaana ka soo jeeda waqooyiga Afrka.

Dhinaca kale xulka qaranka Tunisia ayaa barbaro gool la’aan ah la galay xulka qaranka Libia oo isagu xili horeba ka quustay koobka aduunka waxayna Tunisia noqdeen dalkii saddexaad ee Carab-Afrikan ah ee koobka aduunka booskooda ka xaqiijistay iyaga oo Masar iyo Morocco kula biiray.

Sidaa daraadeed, shanta xul qaran ee koobka aduunka uga qayb gali doona Afrika ayaa hadda la wada ogyahay laakiin saddex ka mid ahi waxay ka soo jeedaan waqooyiga Afrika waana wadama Carbeed isla markaana qaaramada Afrika ku yaal.

Senegal iyo Nigeria ayaa ah labada xul qaran ee aan waqooyiga Afrka ka soo jeedin ee koobka aduunka u soo baxay iyada oo Senegal ay xalay booskooda xaqiijisteen kadib markii ay guul ka soo gaadheen South Afrika oo ay la ciyaareen kulan dib loo ciyaaray markii musuq maasuq uu garsoore sameeyay meesha laga saaray.

Xulalka qaramada Cemeroon, Ivory Coast, Ghana, South Afrika, Algeria iyo Burkino Faso oo ka mid ahaa wadamadii la filayay in ay boos ka heli karaan koobka aduunka ayaa ku fashilmay.

SHANTA XUL QARAN EE AFRIKA KOOBKA ADUUNKA UGA QAYB GALI DOONA:

1-Masar

2- Nigeria

3- Senegal

4-Morocco

5- Tunisia