Chelsea ayaa aheyd mid liidata xilli ciyaareedkan oo dhan, laakiin inta ay gaarsiisan tahay hoos u dhacooda waxa ay si weyn u soo baxday kulankii shalayto ee Stamford Bridge. Istaatistikadii la uruuriyay ayaana soo bandhigeysa sida Chelsea xaalka ugu xun yahay.

Waxa ay aheyd markii labaad oo Chelsea seddex gool looga dhaliyo seddexdii kulan ee ugu danbeysay ee Stamford Bridge. Goolal intaas la eg garoonkooda loogama dhalinin 55tii kulan ee ka horeysay ee Premier League.

Liverpool iyagana waxa ay u aheyd markii ugu horeysay ee wax ka badan labo gool ay kulan horyaalka ku dhaliyaan Stamford Bridge tan iyo 1989kii. Guuldarada soo gaartay Chelsea ayaa ka dhigeysa midii lixaad ee soo gaarta wiilasha Mourinho xilli ciyaareedkan, waxaana dhamaatay kaliya October.

Jugta ugu xoogan ee dhibaatada Chelsea waxa ay soo gaareysaa geesiyaasheeda John Terry iyo Eden Hazard. Qaab ciyaareedka kabtanka ayaa hoos u sii socda isbuucba isbuuca ka danbeeya, mana jirto soo noqosho uu sameynayo.

Waa uu la tartami waayay Christian Benteke ka dib markii xiddiga reer Belgium uu bedel ku soo galay, kubadaha madaxa waxa uu Terry ku guuleystay kaliya boqolkiiba 40, halka xilli ciyaareedkii hore uu kubadaha madaxa ku guuleystay boqolkiiba 74.

Hazard ayaa isna waxaa soo martay galab ay tahay inuu iska ilaawo. Waxaa la bedelay daqiiqadii 58aad waana bedelkiisa ugu dhakhsiyaha badnaa ee lagu sameeyo abid kulan Premier League ah, waana ay cadahay sababta uu Mourinho go’aankaas u qaatay.

Kaliya isagoo garoonka ku jiray 26 daqiiqo xiddiga kale ee reer Belgium Benteke waxa uu dhaliyay gool, waxaana uu caawiye ka ahaa gool kale iyadoo Liverpool ay guul xusuus leh gaartay.