Mubaarak Ibraahim Iidle ayaa loo aqoonsaday inuu yahay ninka keliya ee ka tirsan maleeshiyada Ururka Al Shabaab, ee gelinkii dambe ee Isniintii ka baxsaday Xabsiga Dhexe ee Xamar. Saraakiisha laamaha ammaanka ayaa xaqiijiyay in Mubaarak Ibraahim Iidle oo ku xukunaa 10 sano, ay u suurtagashay inuu ka baxsado xabsiga ugu weyn ee Magaalada Muqdisho, iyadoo xukunkan uu ku dhacay sanadkii 2014. Weydiimo badan ayaa ku gadaaman qaabka iyo sida ay ugu suurtagashay inuu ka baxsado Xabsigan Dhexe ee ku yaala Degmada Xamar Jajab, kuna dhow Dekeda weyn ee Magaalada Muqdisho. Waxaa xusid mudan ka dib markii iska horimaadka uu ka bilowday Xabsiga Dhexe in ay Ciidamada Dowladda xireen dhammaanba wadooyinka soo gala, isla-markaana ay isu gadaameen gidaarka ku hareereysan xabsigaasi, taasoona hoos u dhigeysa suurtagalnimada baxsashadiisa. Hase yeeshee waxaa soo baxaya warar sheegaya in ciidankii gurmadka ahaa ee gaaray Xabsiga Dhexe ay dharka ka bedeleen ninkaasi, qaarkood oo xabsiga dibadda uga soo baxayna uu horey u soo raacay. Ciidanka iyo ninkaas ayaana ku kala haray xabsiga bannaankiisa, intii uu socodka watayna uu xoog ku joojiyay mooto bajaaj, iyadoo rasaastii uu ku joojinayayna ay sababtay geerida wadihii mooto bajaajta iyo qof kale oo shacab ahaa. Sheekada kale ee layaabka leh waxaa weeye in ciidankii ku sugnaa wadooyinka soo gala Xabsiga Dhexe, aysan ku bixin goobtii laga maqlay rasaastii uu ninkaasi ku dilay labadaasi qof, waana mid kale oo loo qaateen ah inay tani tahay qorshe aad mooddo in aad looga soo baaraan-degay, isla-markaana ay qaban qaabada baxsashadiisa ku lug leeyihiin masuuliyiin dowladda ka tirsan. Ninkan oo muddo lix sano ku xirnaa Xabsiga Dhexe ayaa laga soo qabtay Deegaanka Ceelasha Biyaha ee duleedka Magaalada Muqdisho, waxaana la helaya warar sheegaya in soo qabashadiisii, ay laamaha ammaanka ka caawiyeen xubno horaan isugu soo dhiibay Dowladdii Madaxweyne Xasan Sheekh Maxamuud, kana soo goystay mintidiinta Al Shabaab. Mubaarak Ibraahim oo nin dhalinyaro ah ayaa sanadkii 2012 ku biiray Ururka Al Shabaab, waana afar sano ka dib, markii ururkaasi uu si weyn uga soo shaac-baxay Gobolada Koonfurta iyo Bartamaha Somaliya.             Ma cadda muhiimadda uu u leeyahay Ururka Al Shabaab, balse baxsashadiisan waa mid kale oo daaha ka rogeysa sida maleeshiyada Shabaabka ugu dhex-milmeen hay’adihii qaranka, isla-markaana ay sii xoojin doonto garan-waagii dadweynaha ee aheyd ‘Yaa Shabaab yaase dowlad ah?’.