Inta la xaqiijiyay ilaa Afar qof oo kamid ahaa Maxaabiistii ka dhex dagaalameysay Xabsiga Dhexe ee Muqdisho ayaa la toogtay halka tiro kale ay dhaawacmeen, kuwaas oo dagaal la galay Ciidamada ilaalada Xabsiga Dhexe. Maxaabiistaan oo kamid ahaa xukunsanayaasha Al-Shabaab ee Xabsiga ku xiran ayaa wararka la helay waxaa ay sheegayaan in uu gacanta u galay hub yaallay Xabsiga taas oo u sahashay inay dagaalamaan,waxaana sidoo kale wararka la helay ay sheegayaan in uu jiro khasaaro soo gaaray Ciidamada Asluubta ee Xabsiga ilaaliya. Saraakiil ka tirsan laamaha Ammaanka Soomaaliya ayaa waxaa ay sheegeen in la soo afjaray dagaalkii ka socday Gudaha Xabsiga Dhexe ee Muqdisho,isla markaana la toogtay Afar kamid ah Maxaabiistii hubeysneyd ee doonayay inay baxsadaan, waxana intii uu socday dagaalka la maqlayay bambaanooyinka nooca gacanta laga tuuro. Mas'uuliyiin ka tirsan laamaha Ammaanka ayaa gaaray Xabsiga Dhexe ee muqdisho,waxaana Howlgalka lagu soo afjaray la sheegay inay ka qeyb qaateen Ciidamada sida gaarka ah u tababaran ee loo yaqaano Alfa Gruop. .