Taliyaha Ciidamada Booliska dalka Uganda Kale Kayihura, oo Saxaafada kula hadlay magaalada Kampala ee dalka Uganda ayaa sheegay in shacabka Uganda ay xaq u leeyihiin inay cabsi la’aan codkooda u dhiibtaan.

Laamaha ammaanka ayuu sheegay inay heegan buuxa ka galeen amni daro ka dhacdo dalka Uganda ayna ka feejigan yihiin weeraro Shabaab iyo kooxaha kale ka geystaan dalka Uganda inta doorashooyinka ay socdaan.

Taliyaha wuxuu sheegay in muhiimada koowaad ay siin doonaan dhinaca ammaanka, wuxuuna kaga mahad celiyay shacabka dalka Uganda sida ay kaga qeyb qaadanayaan ammaanka goobaha codeynta ay ka dhaceyso dhamaadka bishan February.

Sidoo kale ciidamada Booliska ayuu kaga mahadceliyay waajibaadka ay gudanayaan maadaama magaalooyinka waaweyn ee dalkaasi lagu daadiyay ciidamo badan oo booliska ka tirsan.

Ugu dambeyn ayuu sheegay taliyaha ciidamada booliska dalka Uganda iney shacabka ka dalbanayaan iney si wanaagsan ula shaqeeyaan laamaha amaanka si looga hortago qataro dhanka amaanka ah.