Kooxda Daacish ayaa la sheegay inay bishii Agosto ee sanadkan ku dishay Boosaaso Sarkaal ka shaqeynayay mid ka mid ah Shirkadaha Isgaarsiinta, kaddib markii shirkadda ay bixin weyday lacago ay ku soo rogeen, sidoo kale Kooxda ayaa lagu eedeeyay inay toogasho ku dileen illaa sideed ka tirsan Shaqaalaha Shirkadda Hormuud, sida warbixinta VOA ay sheegtay.

Hase ahaatee La Taliyaha Amniga Qaranka Cabdisaciid Muuse Cali ayaa ku tilmaamay warbixinta VOA inay tahay mid neef siineysa Argagixisada, isla markaana looga baahan yahay lanata Afka Soomaaliga ee VOA inay dib u eegis ku sameyso warbixinada.

"Waxaan u maleynayaa in laanta Afka Soomaaliga ee VOA ay u baahan tahay in dib u eegis ku sameyso Warbixinada ay ka sameynayaan Argagixisada, kuwaasoo qaar sii xumeynaya Xaalada Soomaaliya, VOA ma ahan inay noqoto mid cabsi gelin waana inaanan iloobin dhammaan dadkii ay waxyeeladu ka soo gaartay Argagixisada, Dhibanayaasha argagaxisadu ay waxyeeleeyaan waa dad qoysas leh waana
in si la mid ah wararkooda la shaaciyo.”ayuu yiri Cabdisaciid oo si weyn u durayay warbixinta VOA.

Balse hadalka Cabdisaciid waxaa uu la kulmay falcelino kala duwan oo ka yimid siyaasiyiin iyo suxufiyiin, iyagoo bogaadiyay warbixinta uu diyaariyay Haaruun Macruuf.

Haaruun Macruuf oo ka jawaabayay hadalka Cabdisaciid ayaa sheegay in warbixinta lagu wareystay dhammaan ganacsatada la kulmay handadaada iyo inay bixiyaan lacago baad ah, isagoo xusay in iyagaba ay ka mid yihiin qoysaska dhabta ah ee dhibanaha u ah Argagixisada.