Maxkamadda Gobolka Maroodi-jeex,ayaa shalay laba sannadood iyo sagaal bilood oo xarig ah ku riday afar dhallinyaro ah oo dhac u geystay nin sawir qaade ah oo u dhashay dalka Japan.Dhallinyaradan oo maxkamadda horteeda ka qirtay fal-dambiyeedka waxa kaloo lagu xukumay in ay soo celiyaan lacag 5,000 kun oo Dollar oo ay ka dhaceen sawir qaadahan. Sawir qaadahan oo lagu magacaabo Kazawa Taichi, ahna sawir qaade dhinaca farshaxanka ah (Photo Artist), islamarkaana Soomali-land ku soo galay ruqsad sharci ah, 24-kii December 2017, abaaro labadii saac ee gelinkii dambe ayey saddex dhallinyaro ah ka heleen Degmada Koodbuur ee Hargeysa, waxaana ay ka qaadeen lacag dhan 5000 kun oo Doollar, Baasaboorkii, Lens-ka Kamaradda iyo Hard disk. Waxaa la sheegay in Dhalinyaradaan markii la kulmeen Sawir qaadahaan waxay markii hore ka codsadeen inuu sawir ka qaado laba ka mid ah, balse kii saddexaad ayaa xagga danbe kaga yimid, kadibna shandad ama boorso uu ninkaasi dhabarka ku sitay ayuu kala baxay lacag dhan 5000 kun oo Dollar iyo alaabta kale.