Macalinka kooxda Manchester United ee Jose Mourinho ayaa wuxuu ka dalbaday maamulka sare ee kooxdiisa reer England inay sida ugu dhaqsida badan ugu dhaqaaqaan soo xero galinta Renato Sanches, si xili ciyaareedka soo aadan ay ugu buuxsadaan khadkooda dhexe, sidoo kale xili ciyaareedkii hore ayuu xidigan bar-tilmaameed u ahaa kooxda United-ka

Hadaba tababare Carlo Ancelotti oo ka hadlayay mustaqbalka Renato Sanches ee garoonka Allianz Arena ayaa wuxuu yidhi: "haatan inaga ayuu tababarka nala qaadanayaa, laakiin waa inaan sida ugu dhaqsida badan go’aan u gaadhnaa, waxaa jira suurtagalnimada uu Renato Sanches kaga bixi karo Allianz Arena, laakiin hadii uu doono wuu nala sii joogi karaa xili ciyaareedka soo aadan”

19 jirkan ayaa wuxuu qeyb ka ahaa safka kooxdii xulka qaranka Portugal ee wacdarada ka dhigay koobkii Euro 2016, kadib markii ay kaga guuleysteen xulkii marti galiyay ee France, gaar ahaan xidigan ayaa wuxuu ku soo bandhigay qaab ciyaareed wanaagsan taasoo ku qasabtay in Bayern Munich ay la wareegto saxiixiisa.

Xili ciyaareed kaamil ah uu ku sugnaa safka kooxda Bayern Munich ma uusan ciyaarin kaliya wax ka badan 17 kulan ee ah horyaalka Bundesliga, wuxuuna kulamadaas ku guuldareystay inuu dhaliyo wax gool ah si uu ugu qanciyo in Ancelotti uu boos ka helo, laakiin Manchester United ayaa laga dhur sugayaa waxa ay ka yeeli doonto xiisahii ay ka qabtay saxiixa laacibkan kadib hadalka kasoo yeedhay Carlo Ancelotti.