Goobahaas waxaa ku yaalla illaa 12 jaziiro macmal ah oo Shiinaha sameystay, kuwaasoo ay ku jiraan xero milateri, waxaana dhulkaas ka jiray murano u dhaxeeyay Shiinaha iyo dalalka deriska la ah.

Markabka dagaal ee Mareykanka oo lagu magacaabo USS Lassen ayaa illaa 12-nautical mile u jirsaday biyaha Shiinaha, waxaana tallaabadan lagu sheegay howl gal bilow ah oo Mareykanka ka sameynayo biyaha lagu muransan yahay ee Shiinaha uu sheeganayo.

Afhayeen u hadlay Wasaaradda Arrimaha Dibadda Shiinaha ayaa cambaareeyay tallaabadan, waxaana uu ku tilmaamay mid ka dhan ah madax banaanida Shiinaha.

Sidoo kale Afhayeen u hadlay Wasaaradda Difaaca Mareykanka ayaa sheegay in meelaha uu Shiinaha sheeganayo uu yahay biyaha caalamiga ah, iyadoo howl galadan ku tilmaamay mid uu ku marayo biyaha lagu mursan yahay.

Mareykanka ayaa sanadkii hore howl gal sidan oo kale ka sameeyay biyaha lagu muransan yahay ee ku yaalla koofurta Shiinaha, iyadoo tallaabadaas cambaareeyay Shiinaha.