Badmaaxiinta ayaa ka mid ahaa shaqaalihii markabka ee la badbaadiyay toddobaadkii hore, kaddib markii ciidamada booliska badda ee Puntland ay weerar ku qaadeen markabka oo muddo bilo ah gacanta ugu jiray burcad-badeedda.

Afarta badmaax ayaa lagu soo dhoweeyay garoonka diyaaradaha Soekarno-Hatta ee magaalada Jakarta, halkaas oo ay ku sugnaayeen qoysaskooda iyo mas’uuliyiin uu ka mid ahaa Wasiirka Arrimaha Dibadda Indonesia.

Wasiirka ayaa u mahadceliyay kabtanka markabka, Ashari Samadikun, oo uu sheegay inuu gacan ka geystay badbaadinta shaqaalaha intii uu socday hawlgalkii lagu soo furtay markabka.

Kabtanka ayaa isaguna raalligelin ka bixiyay geerida shan ka mid ah shaqaalihii markabka, isagoo sheegay inuu ka xumaaday inuusan dhammaan shaqaalihii si nabad ah ugu soo celin karin qoysaskooda.

Sida ay sheegtay AFP, shan shaqaale ayaa la dilay ka hor inta aan ciidamada Puntland dib ula wareegin markabka.

Dadka dhintay ayaa kala ahaa saddex Pakistani ah, hal Hindi ah iyo hal Myanmar u dhashay.

Dhacdada ayaa soo jiidatay dareenka caalamka, gaar ahaan Pakistan iyo Indonesia, maadaama tiro badan oo ka mid ah shaqaalaha markabka ay ahaayeen muwaadiniin u dhashay dalalkaas.