Farriintiisii ugu horreysay ee uu u diray shacabka Soomaaliyeed, Alkan ayaa sheegay inuu sharaf weyn u arko inuu xilka bilaabo xilli ku beegan 60-guurada xiriirka diblomaasiyadeed ee Türkiye iyo Soomaaliya, iyo 15 sano guuradii ka soo wareegtay booqashadii taariikhiga ahayd ee Madaxweyne Recep Tayyip Erdoğan uu Soomaaliya ku yimid sanadkii 2011.

Safiirka ayaa sheegay inuu Muqdisho kula kulmay dhallinyaro Soomaaliyeed, kuwaas oo sida uu xusay ka hadlay xaaladda amniga iyo xasilloonida caasimadda iyo nawaaxigeeda.

Alkan ayaa sheegay in Türkiye ay si buuxda u taageerayso dadaallada Soomaaliya ee dhinacyada amniga, horumarinta iyo xoojinta awoodda hay’adaha dowladda, isagoo tixraacay hadal uu Madaxweyne Erdoğan ka jeediyay Golaha Guud ee Qaramada Midoobay.

Waxa uu sheegay in hadafka ugu weyn ee Ankara uu yahay in xiriirka Soomaaliya iyo Türkiye lagu sii dhiso is-ixtiraam, kalsooni iyo dano wadaag ah, si loo horumariyo xiriirka labada dal iyo danta labada shacab.

Safiirka cusub ayaa sidoo kale sheegay inuu muddada uu Soomaaliya joogo ka faa’iideysan doono fikradaha iyo talooyinka shacabka Soomaaliyeed.

"Albaabbada Safaaraddeennu mar walba way idiin wada furnaan doonaan,” ayuu yiri Alkan.

Xiriirka Soomaaliya iyo Türkiye ayaa sannadihii u dambeeyay ku fiday dhinacyo ay ka mid yihiin amniga, horumarinta, waxbarashada, caafimaadka, ganacsiga iyo iskaashiga istiraatiijiga ah.