Shirka ayaa diiradda lagu saaray xoojinta wada-hadalka iyo iskaashiga dhinacyada amniga, iyadoo la is-weydaarsaday khibrado ku saabsan la-dagaallanka argagixisada iyo sidii loo xoojin lahaa dadaallada wadajirka ah ee lagu taageerayo amniga Soomaaliya.

Ka qaybgalka Taliyaha EUTM Somalia ayaa muujinaya muhiimadda ay Midowga Yurub siinayo iskaashiga caalamiga ah ee dhinaca amniga Soomaaliya, xilli dowladda Soomaaliya ay waddo howlgallo iyo qorshayaal lagu xoojinayo ciidamada qaranka.

EUTM Somalia ayaa sheegtay inay ka go’an tahay taageeridda lahaanshaha iyo hoggaaminta Soomaaliya ee arrimaha amniga, iyadoo xoogga saaraysa dhisidda awoodda ciidamada iyo horumarinta hay’adaha difaaca qaranka.

Hawlgalka Midowga Yurub ayaa sidoo kale tilmaamay in dagaalka lagula jiro argagixisada u baahan yahay hannaan ka ballaaran howlgalada milatari, kaas oo ay ku jiraan horumarinta hay’adaha, ka-hortagga xagjirnimada iyo iskaashiga caalamiga ah.

Shirka Muqdisho ka dhacay ayaa kusoo beegmaya xilli Isbahaysiga Milatari ee Islaamiga ah uu Soomaaliya ka bilaabay barnaamijyo la xiriira la-dagaallanka argagixisada, kuwaas oo ay qayb ka yihiin tababaro, dhisidda awoodda hay’adaha iyo taageero dhinacyo kala duwan ah.

EUTM Somalia ayaa sheegtay in iskaashi joogto ah iyo mas’uuliyad wadaag oo dhex mara Soomaaliya iyo bahwadaagta caalamka ay muhiim u yihiin in la helo Soomaaliya ammaan badan oo awood u leh inay si madax-bannaan uga hortagto khataraha amni.