Milkiilaha kooxda heerka koobaad ee horyaalka Turkiga ka ciyaarta ee Ankaragucu ayaa garoonka soo galay Isniintii isaga oo carreysan markii kooxdiisa gool bar baro ah laga dhaliyay, waxa uuna feer madaxa uga dhuftay garsoorihii ciyaarta.

Faruk Koca ayaa si deg deg ah garoonka ugu soo orday markii kooxdiisa gool wadnaha jaray laga dhaliyay daqiiqadii 97-aad, waxa uuna si toos ah u abaaray garsoorihii ciyaarta hayay kaa uu durba feer ku bilaabay.

Guddoomiyaha FA-ga Turkiga Mehmet Buyukeks ayaa shaaciyay in la hakiyay dhammaan ciyaaraha horyaalka Turkiga, waxa uuna xusay in ay socdaan baaritaano lagu sameenayo weerarka uu milkiilaha kooxda Ankaragucu u geestay garsooraha.

"Ciyaarihii horyaallada oo dhan dib ayaa loo dhigay ilaa muddo aan la cayimin .Weerarkan waxa uu ceeb u yahay kubadda cagta Turkiga” ayuu yiri madaxa ugu sareeya horyaalka kubadda cagta ee Turkiga.

Madaxweynaha Fifa Gianni Infantino ayaa weerarja garsooraha loogu geestay gudaha Turkiga ku tilmaamay mid aan la aqbali karin, waxa uuna caddeeyay in rabshadaha boos ku laheyn ciyaaraha iyo bulshada dhaxdooda.