Shirkan oo ka dhacay Caasimadda Tatarstan ee Kazan waxaa ka soo qayb galay Wasiirrada Dhalinyarada iyo Cayaaraha ee qaar ka mid ah dalalka xubnaha ka ah ururka wadamada Islaamka OIC, ururro caalami ah iyo qaar ka mid ah hoggaanka ururrada dalalka Islaamka.


Wasiir Maxamed Barre Maxamuud oo shirka ka jeediyay khudbad dhinacyo badan taabanaysa oo isugu jirtay fursadaha iyo caqabadaha ay ka midaysanyihiin dhalinyarada dunida islaamka ayaa si qoto dheer uga hadlay arrimaha dhalinyarada Soomaaliyeed iyo dadaalka ay ugu jiraan inay Soomaaliya ka dhigaan dal lagu soo hirto oo soo jiita maalgashiga caalamiga ah, isagoona sheegay in dalka Soomaaliya uu leeyahay Badda Afrika ugu dheer oo ah in ka badan 8 million oo Hectares oo ah dhul beereed iyo in ka badan 50 Million oo ah noocyada kala duwan ee xoolaha.

"Raasumaalka ugu qaalisan ee Soomaaliya leedahay waa in dadkeeda oo boqolkiiba 75% ay ka yaryihiin da'da 35 jir oo ah kuwa habeen iyo maalin ka shaqaynaya Soomaaliya nabadda ah oo isku fillan, waxaana jira kumanaan qurbaha wax ku soo bartay oo dalkooda dib ugu soo noqdeen si ay uga qayb galaan dib u dhiskiisa" ayuu yiri Wasiirka Dhalinyarada Maxamed Barre.

Wasiirka Dhalinyarada iyo Cayaaraha Soomaaliya ayaa sidoo kale sheegay in caqabadaha ay wadaagaan Dhalinyarada ku nool dalalka Islaamka ay tahay dhibaatada kooxaha Argagxisada ah ku hayaan dunida, kuwaas oo isku dayaya inay qaloociyaan fahamka saxda ah ee Diinta Islaamka.