Guddoomiyihii hore ee Gobolka banaadir ahaana Duqa Muqdisho Taabit Cabdi Maxamed ayaa soo dhaweeyay shirka lagu wado in Maalinta berito ah uu Madaxda Dowlad Goboleedyada uga furmo Magaalada Dhuusamareeb. Qoraal uu Taabit Cabdi soo dhigay bartiisa facebook ayuu ku sheegay in wada-hadalka uu yahay mid dawo u ah Shacabka Soomaaliyeed iyo dowlad walba,isaga oo bogaadiyay kulanka Magaalada Dhuusamareeb. Sidoo kale Taabit Cabdi ayaa waxaa uu sheegay in shirka Magaalada Dhuusamareeb loo baahan yahay in uu intaasi ka ballaarto,iyada oo la eegayo duruufaha dalka kajira,isla markaana wajiga labaad ee shirka ay ku biiraan Madaxda Dowladda Federaalka Soomaaliya. Hoos Ka Akhriso Qoraalka Guddoomiyihii hore ee Gobolka banaadir.

Wadahadalku waa u dawo Dad iyo Dowladba. Shacabka Soomaaliyeed waxay rabaan nabad, maamul wanaagsan iyo wadajir, waana sababta loo dhageysanayo qof walba oo maanta yiraahda waxaan wadaa dib u heshisiin siyaasaddeed iyo mid bulsho.

Waxaan boggaadinayaa kullanka Dhuusamareeb, waxaana ugu baaqayaa madaxda isugu imaaneysa caasimadda Galmudug in ay curiyaan aragti badbaadin karta Dowladnimada Soomaaliya, abuuri kartana doorasho la isla ogolyahay oo aan lumineyn xuquuqda muwaadiniinta Soomaaliyeed.

Sidoo kale waxaa muhiim ah in kullanku uu intaas ka ballaarto iyadoo la eegayo waqtiga ka dhiman muddo xilleedka madaxda Dowladda hada jirta, oo wajiga labaad ee shirka ay ku biiraan madaxda Dowladda Federaalka ah iyo Xisbiyada Siyaasadda, si loo helo xal Qaran.

Mahad-badan.