"Magaceygu waa Lawrence Rinui Kamau, waxaan ahay muwaadin Kenyan ah oo ka tirsan Ciidanka Difaaca Kenya (KDF), waxaan ka soo jeedaa Gobolka Bartamaha Kenya ku yaala ee Kiambu County, waxaana ka dhashay qabiilka Kikuyu. Sidoo kalana waxaan ahay nin xaas iyo carruur leh, da’deedu waa 30 jir, muddo toddobo sano ah ayaana ka tirsanaa Ciidanka Kenya. Waxaan Somaliya ku sugnaa muddo laba toddobaad ah.” Ayuu yiri Lawrence Rinui Kamau.

Mar uu ka hadlaayay qaabka uu ugu gacanta galay Al Shabaab, ayaa wuxuu sheegay in 5-tii subaxnimo maalintii Jimcaha, ay Ururka Al Shabaab weerar ballaaran ku soo qaadeen Xeradoodii, ayna Shabaabku cagta mariyeen fariisimihii uu ku sugnaa.

"15-kii bishii January 2016-kii ayay weerar culus nagu soo qaadeen Al Shabaab, iyagoo noo awood sheegtay, cagtana mariyay Saldhigii ciidan ee aan ku sugnaa. Inta badan saxibadey waala laayay, qaarna waa dhaawacmeen, aniga iyo qaar kalana waxaan ku dhacnay gacanta Al Shabaab, ka dib markii dagaalka nalagu soo qabtay. Weerarku wuxuu nagu bilowday abaarihii 5-ta subaxnimo, iyadoona ay Ciidanka Al Shabaab inoo awood sheegteen.” Ayuu yiri askariga maxbuuska ah.

Askarigan, ayaa Dowladda Kenya iyo Amisom ugu baaqay inay ka shaqeeyaan, sidii uu kaga soo bixi lahaa gacanta Ururka Al Shabaab, si isaga iyo askarta kale ee lala soo qabtayba, ay u hellaan nolol nabadgelyo leh.

"Waxaan rabaa inaan dhambaal farriin ah gaarsiiyo Dowladda, shacabka Kenya iyo sidoo kale Amisom, waxaana ka dalbanayaa inay ka shaqeeyaan, sidii si nabadgelyo ah la’igu sii dayn lahaa, si ay noogu suurtagasho inaan u helno nolol nabadgelyo leh, dibna aan ula midoobi lahayn qoysaskeena. Haddii ayba suurtagal tahay.” Ayuu yiri Lawrence Rinui.