Sida lagu sheegay warbixinta, Ilhaan Cumar ayaa 12-kii Oktoobar, maalintii baaritaanka gurigeeda la sameeyay, urursatay qiyaastii $847,000, halka maalintii xigtay ay heshay $665,000 oo kale. Isku darka labada maalmood ayaa ka badan $1.5 milyan.

Lacagtan ayaa qayb ka ahayd ku dhowaad $1.9 milyan oo ay xildhibaanaddu urursatay labadii toddobaad ee ugu horreeyay bishii Oktoobar, sida lagu sheegay xogta guddiga doorashooyinka federaalka Mareykanka.

Baaritaanka guriga Ilhaan Cumar ayaa la xiriiray baaritaan dembiyeed ay wadeen hay’adaha federaalka, kaas oo la sheegay inuu eegayo dukumentiyada socdaalka ee xildhibaanadda iyo qoyskeeda. Ilhaan ayaa eedeymaha la xiriira wax isdaba-marinta socdaalka beenisay, iyadoo baaritaanka ku tilmaantay isku-day siyaasadeed oo lagu doonayo in lagu cabburiyo.

Madaxweynaha Mareykanka Donald Trump ayaa marar badan weerarro afka ah ku qaaday Ilhaan Cumar, taas oo ka mid ah dadka sida weyn u dhaliila siyaasaddiisa. Dhaleeceyntiisa iyo baaritaanka gurigeeda ayaa sare u qaaday dareenka ku aaddan xildhibaanadda, iyadoo taageerayaasheedu ay dhaqaale ugu yabooheen ololaheeda.

Ilhaan Cumar ayaa sheegtay inay u baahan tahay taageero dhaqaale si ay uga hortagto caqabadaha sharci ee soo wajahay.

Warbixinta The Washington Post ayaa sidoo kale xustay in xildhibaanaddu ay ilaa waqtigaas urursatay in ka badan $8 milyan intii uu socday wareegga ololaheeda doorasho ee labada sano ah.

Xogtan ayaa muujinaysa koror weyn oo ku yimid taageerada dhaqaale ee Ilhaan Cumar xilliga uu sii xoogeysanayo khilaafka siyaasadeed ee kala dhexeeya maamulka Trump, inkasta oo aan la oran karin dhammaan lacagaha la ururiyay ay si toos ah uga dhasheen weerarrada madaxweynaha.

Xigasho:- The Washington Post.