Madaxweynaha Soomaaliya, Xasan Sheekh Maxamuud, ayaa kormeer shaqo ku tagay markabka shidaalka qodaya ee Çağrı Bey, kaas oo ku sugan biyaha Soomaaliya, halkaas oo uu ka wado hawlaha qodista shidaalka dalka.

Madaxweynaha ayaa intii uu kormeerka ku jiray kulan la yeeshay khubarada iyo mas’uuliyiinta markabka, isaga oo ka dhageystay warbixin ku saabsan hawlaha qodista, shaqada ilaa hadda la qabtay iyo natiijooyinka hordhaca ah ee laga gaaray.

Kormeerkan ayaa imanaya xilli Soomaaliya ay dadaal ugu jirto ka faa’iidaysiga khayraadka dabiiciga ah ee ku jira dhulkeeda iyo biyaha badda, gaar ahaan shidaalka oo la filayo inuu door ka qaato horumarinta dhaqaalaha dalka.

Warbixinta laga siiyay madaxweynaha ayaa sidoo kale la xiriirtay horumarka laga sameeyay hawlaha qodista iyo guulaha hordhaca ah ee la diiwaangeliyay, kuwaas oo dowladda ay danaynayso inay u horseedaan xaqiijinta khayraadka shidaal ee Soomaaliya.

Hawlaha uu markabka Çağrı Bey ka wado biyaha Soomaaliya ayaa qayb ka ah qorshaha lagu ogaanayo laguna xaqiijinayo jiritaanka shidaalka ku jira badda dalka, iyadoo natiijooyinka laga helo qodista ay muhiim u yihiin go’aaminta tallaabooyinka xiga ee mashruuca.

Markabka Çağrı Bey ayaa qodista ka wada ceelka Curad-1, oo ku yaalla meel qiyaastii 370 kiiloomitir u jirta xeebta Muqdisho. Qorshuhu waa in qodista laga sii dhaadhaco ilaa 4,000 oo mitir oo ka hooseeya gunta badda, iyadoo ceelka oo dhan la doonayo inuu gaaro qoto dhan 7,500 oo mitir.

Markabka waxaa taageeraya maraakiibta Altan, Korkut iyo Sancar, halka ciidamada badda Turkiguna ay qayb ka yihiin sugidda ammaanka.

Iskaashiga shidaal iyo gaas ee Soomaaliya iyo Turkiga ayaa salka ku haya heshiisyo la kala saxiixday sanadkii 2024. Markabka cilmi-baarista seismic-ka ee Oruç Reis ayaa markii dambe xog saddex-geesood ah ka ururiyay dhul-badeed gaaraya 4,464 kiiloomitir oo isku wareeg ah. Kadib ku dhowaad toddobo bilood oo sahanno iyo falanqayn xogeed ah, ayaa ceelka Curad-1 loo doortay goobta ugu horreysa ee qodista.

Si kastaba, Dowladda Federaalka Soomaaliya ayaa muddooyinkii dambe xoogga saareysay qorshayaasha la xiriira sahaminta iyo soo saarista shidaalka, iyadoo rajada laga qabo khayraadkan ay la xiriirto kobaca dhaqaalaha, abuurista fursado shaqo iyo kordhinta dakhliga dowladda.

Kormeerka Madaxweyne Xasan Sheekh Maxamuud ayaa muujinaya muhiimadda ay dowladda siinayso hawlaha shidaal qodista iyo dadaallada lagu xaqiijinayo khayraadka ku jira biyaha Soomaaliya.

Xigasho:-Caasimadda.net