Nin lagu magacaabi jiray Siciid Maxamed Siciid oo ku magac dheeraa Siciid Gundho ayaa saaka isku dilay goob ganacsi oo ku taalla degmada Ufayn ee gobolka Bari ee maamulka Puntland, sida ay sheegeen ilo kala duwan.

Sida xogta laga helayo deegaanka, dhacdadu waxay ka dhacday gudaha goob ganacsi oo ku taalla degmada, iyadoo aan weli si rasmi ah loo shaacin faahfaahinta ku saabsan waxa sababay is-dilka.

Ilo deegaanka ah ayaa sheegay in Siciid Gundho muddooyinkii dambe uu ka xanuunsanaa dhimirka, hase yeeshee arrintaasi si rasmi ah looma xaqiijin, waxaana weli socda baaritaanno la xiriira dhacdada.

Ciidamo ka tirsan kuwa ammaanka Puntland ayaa gaaray goobta, halkaas oo ay ka sameeyeen baaritaanno hordhac ah oo ku saabsan dhacdada.

Ciidamada ayaa sidoo kale goobta ka qaaday haraadiga rasaastii u nafta isku dhaafiyay, iyadoo baaritaanno lagu ogaanayo sida uu hubka ku helay iyo duruufaha ku xeernaa dhacdada. Arrintan ayaa dhalisay su’aalo ku saabsan sida hubkaasi uu gacantiisa ku galay.

Dhacdadan ayaa sidoo kale dib u soo celisay dhacdo hore oo la xiriirta qoyska, iyadoo la sheegay in walaalkiis uu sanadkii 2021 sidaas oo kale isku dilay.