Warbixinno ka soo baxay diblomaasiyiinta Afrika ayaa muujinaya in waddamo ay ka mid yihiin Gaana iyo Nayjeeriya ay muwaadiniintooda uga digeen inay ka fogaadaan goobaha ay ka dhacayaan dibadbaxyadu, isla markaana ay xidhaan ganacsiyadooda si ay uga badbaadaan rabshado suurtagal ah.

Dibadbaxyadan oo ay soo abaabuleen kooxo ka soo horjeeda socdaalka sharci darrada ah ayaa lagu qabtay Biritoriya, halkaas oo boqolaal qof ay isugu soo baxeen waddooyinka iyaga oo ku dhawaaqaya erayo ka dhan ah muhaajiriinta. Qaar ka mid ah dibadbaxayaasha ayaa sheegay in ajaanibta ay shaqooyinka ka qaataan dadka maxalliga ah isla markaana ay si aan caddaalad ahayn uga faa’iidaystaan adeegyada bulshada.

Madaxweynaha Koonfur Afrika, Cyril Ramaphosa, ayaa si adag u cambaareeyay weerarrada lagu hayo ajaanibta, isaga oo ugu baaqay muwaadiniinta inay ka fogaadaan naceybka iyo takoorka. Wuxuu xusay in dalalka Afrika ay taageero weyn siiyeen Koonfur Afrika xilligii la dagaallanka nidaamkii midab-takoorka.

Si kastaba ha ahaatee, dareenka ka dhanka ah muhaajiriinta ayaa sii xoogeysanayay sannadihii u dambeeyay, iyadoo qaar ka mid ah bulshada Koonfur Afrika ay aaminsan yihiin in ajaanibta ay kordhiyaan dambiyada isla markaana ay culays saarayaan dhaqaalaha dalka. Arrintan ayaa marar badan horseeday rabshado dhimasho sababay oo lagu beegsaday muhaajiriinta.

Dhanka kale, dowladda Nayjeeriya ayaa qorsheyneysa inay dib u celiso muwaadiniinteeda doonaya inay ka baxaan Koonfur Afrika, iyadoo in ka badan 130 qof ay iska diiwaangeliyeen barnaamijkaas. Mas’uuliyiinta Nayjeeriya ayaa muujiyay walaac xooggan oo ku saabsan badbaadada muwaadiniintooda.

Wararka ayaa sidoo kale tilmaamaya in muwaadiniin Itoobiyaan ah lagu dilay weerarro kala duwan toddobaadyadii la soo dhaafay, halka ganacsiyada ajaanibta ay si weyn hoos ugu dhaceen. Muhaajiriin badan ayaa sheegay inay dareemayaan cabsi joogto ah, iyaga oo ka digaya in xaaladdu kasii dari karto haddii aan si degdeg ah wax looga qaban xiisadaha isa soo taraya.