Munaasabadda caleemo saarka ayaa waxaa ka soo qeyb galay boqolaal qof oo isugu jiray odayaal dhaqameed, siyaasiyiin, waxgarad, haween, dhalinyaro iyo marti sharaf kale. Dadkii ka hadlay xafladda caleemo saarka ayaa si weyn u soo dhaweeyay nabadoonka cusub, iyagoo ku tilmaamay hoggaamiye leh aqoon, karti, hufnaan iyo waayo-aragnimo dheer oo ku saabsan dhexdhexaadinta iyo xalinta khilaafaadka.

Nabadoon Xasan Xiireey, oo kamid ahaa odayaashii ka hadlay munaasabadda, ayaa sheegay in caleemo saarka Cabdi-jamaal uu yahay mid ka tarjumaya midnimada iyo wadajirka beesha. Sidoo kale, siyaasiyiin iyo hoggaamiyeyaal kale ayaa carrabka ku adkeeyay muhiimadda ay leedahay hoggaan dhaqameed xooggan oo ka qeyb qaata xasilloonida iyo nabadda deegaannada.

Haweenkii iyo dhalinyaradii goobta ka hadlay ayaa iyaguna soo dhaweeyay caleemo saarka, iyagoo ku tilmaamay Cabdi-jamaal shaqsi lagu yaqaan cadaalad, dulqaad iyo u adeegidda bulshada. Waxay sidoo kale muujiyeen rajo ah inuu dhiirrigelin doono barnaamijyo la xiriira horumarinta bulshada, waxbarashada iyo fursadaha dhaqaale, isla markaana uu ka shaqeyn doono in dhalinyarada lagu daro hoggaanka dhaqanka.

Nabadoon Cabdi-jamaal Muxumed Cali ayaa carrabka ku adkeeyay muhiimadda midnimada iyo wadajirka.

"Xilku ma aha mid magac u yaal ah,” ayuu yiri. "Wuxuu u baahan yahay dadaal, dhexdhexaadnimo iyo faham qoto dheer oo bulshada ah. Waxaan ballan qaadayaa inaan si siman ugu adeego dhammaan xubnaha beesha.”

Wuxuu sidoo kale u mahadceliyay dhammaan dadkii ka qeyb qaatay munaasabadda, isagoo ballan qaaday inuu ku shaqeyn doono cadaalad, daacadnimo iyo u adeegidda bulshada.