Dowladda Fedaraalka oo shaacisay inuu geeriyooday Horjoogihii ugu halista badnaa Al-shabaab

Wasiirka Wasaaradda Gaashaandhigga Xukuumadda Fedaraalka Soomaaliya Axmed Macalin Fiqi ayaa shaaciyay inuu shalay geeriyooday Horjoogihii ugu halista badnaa Al-shabaab ee deegaanada maamul goboleedyada Galmudug iyo Hirshabeelle.

Horjoogahaan oo lagu magacaabo Nuur Cabdi Rooble Nuunuule ayaa u dhintay dhaawac culus oo la sheegay inuu Daraad kasoo gaaray howlgal ciidanka dowladda iyo kuwa saaxiibada Caalamka ka fuliyeen inta u dhaxeysa deegaanada kala aha Ceel hareri io Garas magan ee gobolka Hiiraan.

"Waxaan umadda Soomaaliyeed la wadaagaya dhimashada mid ka mid ah horjoogayaashii Al-shabaab ugu dhagarta badnaa Nuur Cabdi Rooble Nuunuule inuu u dhintay dhaawac daraad ciidanka dowladda iyo saaxiibada caalamiga ugu geysteen howlgal lagu dilay horjoogayaal kale" ayuu yiri Wasiirka Gaashaandhigga Soomaaliya Axmed Macalin Fiqi.

Wasiirka ayaa sheegay in ninkaan uu horay u fuliyay weeraro dhowr ahaa oo ka kala dhacay magaalooyinka kala ah Guriceel. Dhuusamareeb, Galcad, Coosweyne, Ceel lahele, Caad. Xarar dheere iyo Aadan yabaal oo u dambeysay.

"Dowladda Somalia waxay cadeyneysa in cawaaqibta Al-shabaab u dambeysa ay noqoneyso sidaan oo kale, waxaan sidoo kale bogaadinaya guulaha ciidanka xaq u dirirka reer Hiiraan ee dagaalka adag kula jira Al-shabaab" ayuu yiri Wasiirka Gaashaandhigga Axmed Macalin Fiqi.

Hadalkaan kasoo yeeray Wasiirka Gaashaandhiga Soomaaliya ayaa kusoo aadaya, iyadoo sadaxdii maalmood ee laso dhaafay dagaalo qaraar ku dhexmarayeen deegaanka Ceel hareeri iyo nawaaxigiisa ciidanka Macawiisleeyda iyo Al-shabaab, islamarkaana horjooge Nuunuule lagu dilay dagaal Daraad ku dhexmaray Al-shabaab iyo Macawiisleyda inta u dhaxeysa Ceel hareeri iyo Garas magan.

Booliska Gobolka Banaadir oo $30,000 u balan qaaday cidii soo sheegta Kooxaha Hoobiyeyaasha kusoo tuuro Degmooyinka G. Banaadir

Taliyaha Booliska Qeybta Gobolka Banaadir Macalim Mahdi ayaa sheegay in uu ka doonayo shacabka ku dhaqan magaalada Muqdisho gaar ahaan kuwa daafaha Degmooyinka ah inay xog buuxda ka keenaan kuwa hoobiyeyaasha kasoo tuuro Degmooyinkaasi.

Taliyaha ayaa u balan qaaday cidii soo sheegta maclumaadka horseedi kara in la ogaado ama gacanta lagu soo dhigo kooxaha ku howlan weerarada Hoobiyeyaasha lagu soo weeraro Caasimadda Muqdisho ay siin doonaan abaal marin lacageed uu ku farxo Qofka.

Macalim Mahdi ayaa carabka ku dhuftay in abaalmarintaasi lacageed ay bixin doonaan ay gaareyso Sodon kun oo Doolaar ($30,000), waxaana uu shacabka ugu baaqay inay la shaqeeyaan laamaha amaanka.

Mar ay saxaafadda ay su'aal ka weydiisay hadii abaalmarintaasi ay ciidanku wax ka heli doonaan hadii ay keenaan xogta Kooxahaasi ama ay soo qabtaan ayaa waxa uu tilmaamay in Shacab ama Ciidan cidii macluumaad sugan ka keenta Kooxaha caadeeystay weerarada Hoobiyeyaasha ah ee mararka qaar lagu soo weeraro caasimadda ay abaalmarintaasi siin doonaan.

Ugu dambeyn, taliyaha Booliska Qeybta Gobolka Banaadir ayaa shaaca ka qaaday in shacabku aysan dhag jalaq usiinin shaqsiyaad uu sheegay inay sumcad xumeenayaan xasiloonida iyo nabad galyda ka jirta caasimadda Muqdisho.

Guddoomiyaha SODMA oo Geneva kaga qayb galay madasha caalamiga Yareynta Khataraha iyo Musiibooyinka

Guddoomiyaha Hay’adda Maareeynta Musiiboyinka Qaranka Maxamuud Macallin Cabdulle iyo wafti uu hoggaaminayo ayaa Xarunta Qaramada Midoobay ee Geneva – Switzerland, kaga qeyb-galay kal-fadhigii 8-aad ee shir-weynaha madasha caalamiga ah ee Yareynta Khataraha Musiibooyinka, (Global Platform for Disaster Risk Reduction – GPDRR 2025) kaas oo afartii sanaba mar la qabto.

Shirka oo socday intii u dhaxaysay 2 June ilaa 6 June, 2025, waxaa kasoo qeyb-galay in ka badan 2,700 oo qof oo isugu jiray madax sare iyo wafuud matalayay 133 dal, waxaana si gaar ah diiradda loo saaray ka mira-dhalinta doorka muhiimka ah ee yaraynta khataraha, ka hortagga saameynta musiibooyinka iyo in bulshada loo diyaariyo wacyi ahaan wax ka qabashada iyo yareynta waxyeellada khataraha.

Shirkaan oo ay soo qaban-qaabisay Hay’ada Qaramada Midoobay u qaabilsan Yareynta Khatarta Musiibooyinka (UNDRR) ayaa laga jeediyay khudbado taabanaya hoggaaminta, isku xirka iyo horumarinta dadaallada caalamiga ah ee lagu yareynayo khataraha musiibooyinka iyo sida uu dal kasta horumar la taaban karo uga sameeyay dhinacyada la xariira maareeynta khataraha iyo xoojinta u adkeysiga aafooyinka.

Guddoomiyaha Hay’adda SoDMA, Mudane Maxamuud Macallin Cabdulle, ayaa madasha ka jeediyay khudbad muhiim ah, isaga oo ka warbixiyay dadaallada iyo horumarka Dowladda Federaalka Soomaaliya ay ka sameysay dhanka maareynta khataraha musiibooyinka, wuxuu si gaar ah u xusay kobaca iyo dhismaha nidaamyada lagu badbaadinayo nolosha iyo hantida muwaadiniinta Soomaaliyeed.

Shirka qeybtiisa muhiimka ah ayaa lagu gaaray go’aanno wax ku ool ah oo la doonayo in madaxda dalalka madasha ka soo qeeyb-galay ay ayidaan sidii lugu gaari lahaa yoolalka u asteeysan istaraatiijiyadda caalamiga ah ee Sendai Framework taas oo fareysa waddamada in marka la gaaro 2030-ka uu dal kasta si buuxda u dhiso awoodaha lugu yareeynayo khataraha musiibooyinka.

Midowga Afrika oo walaac ka muujiyay xayiraaadda uu Maraykanka kusoo rogay dalal Afrikaan ah

Midowga Afrika (AU) ayaa muujiyay walaac ku saabsan saameynta taban ee ka dhalan karta xayiraadaha socdaal ee uu Mareykanku soo rogay, kuwaas oo saameynaya muwaadiniinta dalal badan oo ay Afrikaan ah ku jiraan.

Guddiga Midowga Afrika (AUC) ayaa qiray in dal walba uu leeyahay xuquuq si uu u ilaaliyo xuduudihiisa uguna xaqiijiyo amniga muwaadiniintiisa. Si kastaba ha ahaatee, waxay ugu baaqeen Mareykanka inuu adeegsado xuquuqdiisa si dheellitiran, caddayn ku saleysan, isla markaana ka tarjumaysa iskaashiga soo jireenka ah ee u dhexeeya Mareykanka iyo Afrika.

"AUC waxay sii waddaysaa muujinta walaaceeda ku aaddan saameynta taban ee tallaabooyinkan ay ku yeelan karaan xiriirka dadka, isweydaarsiga waxbarasho, iskaashiga ganacsi, iyo guud ahaan xiriirka diblomaasiyadeed ee si taxadar leh loo dhisay muddo tobanaan sano ah," ayaa lagu yiri bayaan kasoo baxay Midowga Afrika.

Sidoo kale, AUC waxay ugu baaqday maamulka Mareykanka in uu qaato hannaan la-tashi badan, isla markaana uu la yeesho wadahadal wax dhisaya dalalka ay xayiraaddu saameysey.

Madaxweynaha Mareykanka Donald Trump ayaa Arbacadii fiidkii saxiixay amar lagu mamnuucayo socdaalka muwaadiniinta qaar kamid ah dalalka, isaga oo ku sababeeyay arrimo la xiriira khataraha amniga qaranka.

Sida lagu sheegay war-saxaafadeed kasoo baxay Aqalka Cad, amarkani oo dhaqan geli doona 9-ka Juun, wuxuu gabi ahaanba joojin doonaa gelitaanka muwaadiniinta 12 dal: Afgaanistaan, Jabuuti, Jamhuuriyadda Koongo, Equatorial Guinea, Eritrea, Haiti, Iran, Liibiya, Myanmar, Soomaaliya, Suudaan, iyo Yemen.

Jaaliyadda Soomaaliyeed ee gobolka Minnesota oo niyad jab ka muujisay xayiraada socdaal ee Trump

Soomaalida ku nool gobolka Minnesota ayaa muujiyey walaac iyo caro ka dhan ah xayiraadda socdaalka ee uu dhawaan ku dhawaaqay madaxweynaha Mareykanka, Donald Trump, taasoo beegsanaysa muwadiniinta 12 dal oo ay ku jirto Somalia, islamarkaana xaddideysa gelitaanka Mareykanka laga bilaabo bisha soo socota.

Dalalka ay xayiraaddu si buuxda u saameyneyso waxaa ka mid ah: Afgaanistaan, Myanmar, Chad, Congo, Equatorial Guinea, Eritrea, Haiti, Iran, Libya, Somalia, Sudan, iyo Yemen. Sidoo kale, dalalka Burundi, Cuba, Laos, Sierra Leone, Togo, Turkmenistan, iyo Venezuela ayaa wajahaya xayiraado qeyb ahaan ah.

Minnesota, oo ay ku nool yihiin in ka badan 86,000 oo Soomaali ah, ayaa ah mid ka mid ah goobaha ugu weyn ee ay Soomaalidu ku xooggan yihiin gudaha Mareykanka, waxaana hoggaamiyeyaasha bulshada ay sheegeen inaanay la yaab ku noqon xayiraaddan cusub.

"Waxaa jira cabsi iyo niyad-jab, gaar ahaan dadka weli dibadda ku sugan ee sugaya in dib loo dejiyo,” ayuu yiri Hassanen Mohamed, Agaasimaha Xarunta Bulshada Soomaaliyeed ee Minnesota.

"Dadkaasi horey ayaa loo baaray, faraha laga qaaday, diyaarna waa u yihiin in la dejiyo, balse tallaabooyinka degdegga ah ee noocan ah waxay keenayaan dib u dhac iyo hubanti la’aan dheeraad ah,”ayuu yiri Hassanen Mohamed.

Mas’uuliyiin Mareykan ah ayaa sheegay in xayiraadda cusub aysan saameyn doonin dadka horey u haysta fiisayaal socdaal ama kuwo socdaalka u oggolaanaya.

Xukuumaddii hore ee Trump ayaa markii ugu horreysay xayiraad muran dhalisay ku soo rogtay dalal Muslimiinta u badan sanadkii 2017, taasoo ay ku jirtay Soomaaliya. Siyaasaddan ayaa wajahday maxkamado iyo wax-ka-beddel, ka hor intii aanay Maxkamadda Sare ee Mareykanka ansixin sanadkii 2018.

Madaxweyne Joe Biden ayaa markii uu xafiiska la wareegay 2021, ka noqday xayiraaddaas, isaga oo ku tilmaamay mid ceeb ku ah damiirka qaran ee Maraykanka.

Wareegto uu Biden saxiixay ayaa meesha ka saartay xayiraadihii saarnaa muwaadiniinta dalalka Iran, Libya, Somalia, Syria, iyo Yemen.

Soo noqoshada xayiraaddan socdaalka ee ku jirta ballan-qaadyada ololaha cusub ee Trump ayaa dib u kicisay cabsi ku saabsan dib u midoobidda qoysaska qaxootiga iyo howsha dalbashada magangelyo.

Hay’adaha bulshada ee Minnesota ayaa sheegay in ay u diyaar garoobayaan sidii ay u taageeri lahaayeen qoysaska ay saameynta ku yeelatay tallaaabadan, waxayna ugu baaqayaan madaxda la doortay in ay ka horyimaadaan siyaasadaha ay u arkaan kuwa takoor ah.

Guddoomiyaha jannaale: Cadowga Al-shabaab waan dabar jaraynaa

Ciidamada kala ah Xoogga dalka iyo Sirdoonka qaranka NISA ee ku sugan gobolka Shabeellaha hoose ayaa hawlgal Amni xaqiijin ah ka sameeyey deegaanada ku hareeraysan Jannaale, iyagoo isku fidiyey deegaanno balaaran.

Guddoomiyaha deegaanka Jannaale ee gobolka Shabeellaha Hoose Cabdiraxmaan Al-Cadaala oo kula hadlay shacabka deegaanka Mushaani ayaa yiri "Cadowga Al-shabaab waxa ay dhaheen Saalada Ciida waxaan ku tukanaynaa Janaale balse deegaanadii ay joogeen ayaa shalay Saalada Ciida ku oognay.”

Ciidanka xoogga iyo kuwa difaaca deegaanka ee Macawisleyda ayaa maalmihii u dambeeyey hawlgalo xooggan ka waday gobolada Shabeellaha Dhexe, Hiiraan iyo Shabeellaha hoose halkaas oo al-shabaab loogu geystay jab xooggan.

Al-shabaab ayaa jabkii ugu cuslaa la gaarsiiyey daraad ka dib markii hawlgal si gaar ah loo qorsheeyey looga dilay in ka badan 40 horjooge iyo maleeshiyaad ka tirsan Al-shabaab howlgalkan ayaa waxa si gaar ah u qorsheeyay Ciidanka Hay’adda Sirdoonka iyo Nabadsugidda Qaranka (NISA), Ciidanka Xoogga Dalka Soomaaliyeed, iyo saaxiibada caalamka, kaas oo ka dhacay deegaanka Ceelhareeri ee gobolka Hiiraan.

Koox dabley ah oo magaalada Gaalkacyo ku dilay labo qof oo shacab ah

Koox dabley ah ayaa lagusoo waramayaa inay magaalada Gaalkacyo ku dilaeen labo qof oo shacab ah oo kala ahaa rag iyo dumar ahaa, kuwaas oo xilliga falku dhacayay ka yimid goob dalxiis ah oo kutaala duleedka Gaalkacyo.

Dableyda ah ayaa weerar ku qaaday gaari uu watay marxuumka iyo qofka dumarka ah ee la socday, iyagoo rasaas oodda uga qaaday, halkaasna ku dilay labadooduba.

Lama oga sababta dilkooda ka dambeysay, hase ahaatee warar aanu ka helnay ilo madax bannaan ayaa sheegaya in bartilmaameedku ahaa ninka, iyadoo dilkuna uu salka ku hayo Aargoosi qabiil. Gacan ku dhiiglayaasha falkaan ka dambeeyay ayaa goobta isaga baxsaday.

Maamulka Gobolka Mudug iyo hay’adaha amniga ayaa ku guulaysan waayay inay xal u helaan dilalka ku saleysan aanooyinka qabiilka, kuwaas oo Gobolka Mudug aad ugusoo badanayay, tan iyo intii laga raystay dilalkii iyo qaraxyadii Gaalkaco ay ka geysan jireen ururka Alshabaab.

Dhowr bilood ka hor degaanka Bursaalax ee isla gobolka Mudug ayaa sidaan oo kale aano qabiil loogu dilay labo nin oo ganacsato ahaa, kuwaas oo mid kamid ah uu ahaa maamulihii shirkadda Golis ee degaankaas.

Dadka arrimahan u dhuun daloola ayaa sheegaya in sababaha ay usoo laalaabanayaan dilalkan ay tahay, in aan caddaaladda la marsiinin dambiilayaasha geysta falalkan, kuwaas oo marka ay falka geystaan baxsada lana soo qaban waayo, taasoo keenta in dilalka soo kordhaan.

Sida aan xogta ku helayno, madaxweynaha Puntland ayaa dhawaan la filayaa inuu isbeddel ku sameeyo maamulka gobolka Mudug iyo hay’adaha amniga.

Xaalad deganaaasho ah oo shalay laga soo sheegayo deegaanka Ceel hareeri ee gobolka Hiiraan

Waxaa shalay xaalad deganaasho ah laga soo sheegaya deegaanka Ceel hareeri ee gobolka Hiiraan iyo deegaanada ku dhadhaw oo sadaxdii maalmood ee lasoo dhaafay dagaalo xoogan ku dhexmarayeen ciidanka Macawiisleeyda iyo kuwa kooxda Al-shabaab.

Deegaanka Ceel hareeri oo ka mid ah deegaanada hoostaga degmada Moqokori ee gobolka Hiiraan ayaa ah deegaan istaraatiiji oo ku yaala xadka ay wadagaan gobolada Shabeellaha Dhexe iyo Hiiraan.

Dagaaladii ka dhacay sadaxdii maalin ee lasoo dhaafay ayaa la xaqiijiyay in kooxda looga dilayku dhawaad 100 xubnood oo isugu jira horjoogayaal iyo maleeshiyaad ka tirsan Al-shabaab.

Dowladda Fedaraalka ayaa Daraad shaacisay magacyada horjoogayaasha Al-shabaab looga dilay deegaanka Ceel hareeri iney kala ahayeen Abuu Anas horjoogaha Gaadiidka Jabhadaha iyo Maxamed Axmed Xerow oo ahaa horjooge kooxeed ka tirsanaa cadowga kooxda.

Waxaa sidoo kale howlgalada laga fuliyay Ceel hareeri dhaawacyo culus lagu gaarsiiyay horjoogayaasha kala ah Nuur Cabdi Rooble Nuunuule oo ah horjoogaha maleeshiyaadka u qaabilsan gobollada Hiiraan, Shabeellaha Dhexe, Mudug iyo Galgaduud iyo Horjooge Jeylaani oo hadda ah horjoogaha ugu sarreeya ee jabhadaha kooxda.

Si kastaba ha ahaatee gobolka Hiiraan ayaa ah gobolka kaliya ee haatan uu sida tooska ah uga socdo dagaalada dalka looga ciribtirayo kooxda Al-shabaab.

Waa maxay sababta Gantaalada difaaca hawada sare loo geeyay magaalada Maka xilligan Xajka?

Wasaaradda Difaaca Sacuudiga ayaa baraha bulshada soo dhigtay qaar ka mid ah muuqaallada muujinaya diyaarad helikobter ah oo milateri iyo gantaalada nidaamka difaaca hawada kuwaasi oo la dhigay aag u dhaw Masjid Xaramka ee magaalada Maka oo ah magaalo barakeysan.

Sawiradan la baahiyay, ayaa wasaarada Difaaca Sacudiga waxay qortay, "Ciidanka Difaaca Cirka...ayaa isha si aan libiqsi lahayn uga haya, hawshooduna waa inay ilaaliyaan martida Ilaah."

Mid ka mid ah labada goobood oo lagu baahiyay sawirada gaar ahaan 'X' ee Wasaaradda Difaaca Sucuudigu waxay muujinaysaa nidaamyada gantaallada ka hortaga hubka la soo rido oo la dhigay hareeraha magaalada Maka , halka Sacudiga Clock Tower, oo ah dhismaha caanka ah ee ku yaalla afaafka hore ee Masjidka Xaramka, uu sidoo kale ka muuqdo gadaal.

Sawir kale ayaa muujinaya, iyada oo Diyaarad Helicopter ah ay ku wareegeyso Masjidka barakeysan ee Xaramka iyo agagaarkiisa.

Sanadkan waxaa xajka gudanaya dad gaaraya hal milyan iyo bar oo ka kala yimid daafaha caalamka.

Sawirradan ay faafisay Wasaaradda Difaaca Sacuudiga ayaa si weyn ugu baahay baraha bulshada, waxaana dadka isticmaala baraha bulshada ay is weydiinayaan su'aal ah sababta ay dowladda Sacuudiga ugu baahan tahay in nidaamkan difaaca hawada lagu rakibo halkaasi xilliga xajka?

Waxaa jira dood ka socota baraha bulshada oo qaarkood ay ku andacoonayeen in Sacuudi Carabiya ay nidaamkan difaaca ugu rakibtay Maka munaasabadda Xajka si la isaga ilaaliyo weerarrada suurtagalka ah ee dagaalyahannada Xuutiyiinta Yemen.

Tan iyo markii uu billowday howlgallada ka dhanka ah Xuutiyiinta ee uu hoggaaminayo Sacuudiga, dagaalyahannada Xuuthiyiinta ayaa marar badan sheegtay inay gantaallo la beegsadeen magaalooyinka Sacuudiga.

Geesta kale, Sacuudiga ayaa Xuutiyiinta ku eedeeyay inay horey u soo weerareen magaalada Makkah. Si kastaba ha ahaatee, Xuuthiyiinta ayaa iska fogeeyay eedeymaha ah in ay weerareen magaalada barakeysan ee Muslimiinta.

Maxay ka tiri dowladda Sacuudiga ?

Sacuudi Carabiya ayaa gaysay nidaamka gantaalaha ka hortaga gantaalada akle ee al soo tuuro ee loo yaqaano American Patriot agagaarka Makka si ay u ilaaliyaan xujeyda, sida ay sheegtay warbaahinta Sacuudiga.

Sida ay ku warantay wakaalada wararka Sucuudiga ee Saudi Press, Wasaaradda Arrimaha Guduhu waxay todobaadkan qabatay shir jaraa'id oo ay kaga warbixisay amniga iyo qabanqaabada wanaagsan ee xujeyda ee xajka. Arintaan ayaa saraakiisha sar sare ee amaanka waxa ay uga warameen talaabooyinka lagu xaqiijinayo amaanka xiliga xajka.

Shirkan jaraa'id oo uu qabtay Agaasimaha Amniga guud ee Boqortooyada Sacuudi Carabiya, Sarreeye Guud Maxamed Al-Bassami oo la hadlay warbaahinta ayaa sheegay in Sacuudiga ay ka go'an tahay in xujeyda ay helaan deegaan ammaan ah oo habeysan, si taas loo gaarona la diyaariyay nidaam amni oo wadajir ah.

Tan waxaa ku jira qabanqaabada amniga, nabadda iyo kala dambeynta, maareynta dadka, taraafikada iyo maareynta xaaladaha degdegga ah. Ujeedadoodu waa in ay helaan tas-hiilaadka ugu wanaagsan xujeyda inta lagu guda jiro xajka Maka iyo Madiina.

Habkan gantaallada ah waxa amaantiisa ay soo baxdayhorraantii 1990-meeyadii

Muxuu yahay Nidaamka Gantaalaha Patriot?

Nidaamka gantaalaha difaaca ee lagu arkay sawirada ay baahisay Wasaaradda Difaaca ee Sacuudi Carabiya waa nooca Patriot MIM 104. Kani waa gantaal iyo hab difaaca oo hawada ah. Waxaa soo saaray shirkadaha Maraykanka ee Raytheon iyo Lockheed Martin.

MIM Patriot 104 waa habka gantaalada riddada dheer ee loogu talagalay in uu ka hortago khataraha hawada ee kala duwan oo ay ku jiraan maraakiibta, gantaalada cruise-ka iyo gantaalada ballistic-ga.

Waxaa lagu yaqaanaa raadaarkiisa casriga ah kaas oo ay ku jiraan awoodda lagu raadinayo laguna burburiyo bartilmaameedyo badan isku mar. Nidaamkan gantaallada ah waxa uu ku shaqeeyaa muddo aad u yar, waxa kale oo uu awood u leeyahay in uu ka hortago oo khadka ka dhumiyo nidaamka elektaroonikada ah.

Nidaamkan gantaalaha ah ayaa soo jiitay indhaha khubarada milatariga isagoo si fiican uga soo muuqday dagaalkii Ciraaq iyo Kuwait horaantii sagaashamaadkii.

Wargeysyo badan oo arrimaha difaaca caalamka wax ka qora ayaa gantaalladan ku daray tobanka nidaam difaac ee ugu sarreeya difaaca casriga ah ee xilligan jira.

Xigasho BBC

Ciidamada Xoogga Dalka howlgal qorsheysan ku dilay horjoogayaal ka tirsan Al-shabaab

Horjoogeyaal kale oo ka tirsan Al-shabaab Al-Shabaab ayaa ku geeriyooday howlgal qorshaysan oo si wadajir ah ay u fuliyeen Ciidanka Hay’adda Sirdoonka iyo Nabadsugidda Qaranka (NISA), Ciidanka Xooga Dalka Somaliyed, iyo saaxiibada caalamiga ah. Howlgalkaasi oo Lixdii bishan Juun 2025, ka dhacay deegaanka Ceelhareeri ee gobolka Hiiraan.

Waxaa la xaqiijiyay in ilaa saddex horjooge oo kale lagu dilay howlgalkaas, kuwaas oo kala ah:

1. Nuur Cabdi Rooble (Nuunle) oo ahaa horjoogaha Al-shabaab u qaabilsanaa gobollada Hiiraan, Shabeellaha Dhexe, Mudug, iyo Galgaduud. Dhiigya-cabkan ayaa u geeriyooday dhaawac culus oo ka soo gaaray weerarka bartilmaameedka ahaa.

2. Horjooge Caddaw oo masuul ka ahaa waxa ay Al-shabaab ugu yeeraan "dabagalka” Jabhaddooda ee Galgaduud.

3. Macallin Cumar oo ahaa horjooge u qaabilsanaa kooxda Al-shabaab marin-habaabinta iyo tababarka maleeshiyaadka.

Tirada guud ee horjoogayaasha Al-shabaab ee lagu dilay howlgalkaas ayaa hadda gaartay shan, kuwaas oo dhammaantood si toos ah ugu lug lahaa abaabuladii Al-shabaab ka wadeen muddooyinkii dambe gobollada Hiiraan iyo Shabeellaha Dhexe.

Dowladda Federaalka Soomaaliya waxay si dhow ula socotaa xaaladda horjoogeyaasha iyo maleeshiyaadka dhaawacmay, kuwaas oo kooxda Al-shabaab isku dayeyso in ay kala baxsadaan goobaha dagaalka.

Ma jirto meel ay uga baxsan karaan cadaaladda iyo geesiyaasha Ciidanka Qaranka Soomaaliyeed, horjoogayaasha dhiig-miiratada ah ee caadeystay dhibaateynta shacabka Soomaaliyeed.