Axmed Macalin Fiqi, Wasiirka Amniga Galmudug ayaa sheegay in Galmudug ay ku hawlan tahay, sidii ay isugu soo dhawayn laheyd Dowladda Federaalka iyo dowladaha xubnaha ka ah.

              Wasiirka oo la hadlay Laanta afka Somaliga ee VOA ayaa sheegay in Galmudug loo arkay mid dhexdhexaadin karta Dowladda Federaalka iyo maamulada qaar, ee ay siyaasadda ku kala aragtida duwan yihiin.

          Wasiir Fiqi ayaa hoosta ka xariiqay inaanay Galmudug cidina la safnayn, hadafkeeduna uu yahay in dalka horey looga dhaqaajiyo xaaladda uu haataan wajahayo.

              Ka hor inta aan shirka lagu soo geba-gabeen Magaalada Dhuusamareeb ayaa waxaa suurtagal ah in lagu soo casuumo Dowladda Federaalka, si hadhow looga soo wada saaro warmurtiyeed loo dhan yahay.

Dhanka kale waxaa weli uu hakad ku jiraa isu socodkii gaadiidka dadweynaha iyo kuwa kale ee gaarka loo leeyahay, si loogu xaqiijiyo ammaanka magaalada.

             Sidoo kale waxaa weli xiran kontoroolada laga soo galo Magaalada Dhuusamareeb, oo aad arki karto inaanay ka soo gudbi karin wax gaadiid ahi.

Reer Dhuusamareeb ayaa si weyn Maamulka Galmudug ugala shaqeynaya xaqiijinta amniga iyo in si nabadgelyo ah, uu ku qabsoomo shirkan ka furmaya Xarunta Galmudug.