Wararka ka imaanaya Magaalada Baardheere ee Gobolka Gedo, ayaa ku waramaya in ciidamada Itoobiya ay sii daayeen Taliyihii ciidamada Booliska Degmada Baardheere, oo tallaadadii la soo dhaafay ay ku xireen Magaalada Baardheere.

Korneyl C/casiis Xasan Cilmi (Aftaag), ayaa dib u helay xuriyadiisa, kadib dadaalo ay sameeyeen Odayaasha Dhaqanka Magaalada Baardheere iyo Saraakiisha ciidamada, taasi oo suuragelisay in Taliyaha dib loo siiyo xuriyadiisa.

Aftaag ayaa u xirnaa ciidanka Itoobiya labo maalin, wuxuuna ku xirnaa Garoonka Diyaaradaha ee Magaalada Baardheere oo fariisin Millateri ay ku leeyihiin ciidamada Itoobiya.

Ilaa hada ma cadda sababta keentay Sarkaalkan Dowladda Somaliya ka tirsan inay xiraan ciidamada Itoobiya, ka sokoow in Sarkaalka uu u janjeeray dhanka Dowladda Somaliya oo uu ka tirsan yahay.

Magaalada Baardheere waxaa ku wada sugan ciidamo ka kala amar qaata, Dowladda Somaliya, Jubbaland iyo Ahlu Sunnada Gobolada Koonfureed, waxaana sii dheer ciidamada Itoobiya oo howlgalka Amisom ka tirsan balse fuliya danahooda gaarka ah.

Saraakiisha ciidamada Dowladda ee Degmada Baardheere kama aysan hadlin xariga iyo Sii deysmada Sarkaalkaan intuba, waxaase suuragal ah in iyaga qudhooda ay baqanayan.

Ciidamada Itoobiya oo Howlgalka Amisom ka mid ah, ayaa lagu dhaliilaa inaysan si toos ah uga amar qaadan Taliska Amisom ee Somaliya oo dalka Somaliya waxaaba ku sugan ciidamo Itoobiyan ah oo Amisom aanan ka tirsaneyn.

Xigasho:- Dhacdo.com