Sida lagu sheegay warsaxaafadeedka, laga bilaabo 14-ka Oktoobar 2026 waxaa dhaqan-galaya qodobbada 81(1)(f) iyo 117(3)(a) ee Dastuurka, kuwaas oo xeerinaya kala-saaridda xilalka xildhibaannada iyo wasiirrada.

Guddigu wuxuu caddeeyay in wasiirkii ah xildhibaan uu luminayo xubinnimada Golaha Wasiirrada, halka xildhibaankuna uu luminayo xildhibaannimadiisa haddii uu aqbalo xil kale oo dowladeed.

Guddiga ayaa sidoo kale ku adkeeyay in hirgelinta qodobadan ay tahay waajib dastuuri ah, isagoo xusay in Dastuurka Jamhuuriyadda Federaalka Soomaaliya uu yahay xeerka ugu sarreeya dalka, marka laga reebo Shareecada Islaamka, ayna waajib ku tahay hay’adaha dowladda inay u hoggaansamaan kuna dhaqmaan.

Warsaxaafadeedkaan uu ku saxiixnaa Guddoomiyaha Guddiga Madaxabannaan ee Dib-u-eegista iyo Hirgelinta Dastuurka, Avv. Burhaan Aadan Cumar ayaa mar kale adkeeyay in dhaqan-gelinta qodobbada dastuuriga ah ay tahay waajib saaran hay’adaha dowladda.