Wadaadka awoodda badan ee Shiicada Ciraaq Muqtada al-Sadr ayaa Mareykanka ugu baaqay inuu shacabka Ciraaq siiyo magdhow la xiriira khasaaraha ka dhashay joogitaankii iyo dagaalladii ciidamada Mareykanka ee dalkaas, xilli askartii ugu dambeysay ee Mareykanka ay ka baxayaan Ciraaq.

Bayaan uu soo saaray Arbacadii, oo ku beegneyd maalintii ugu dambeysay ee loo qabtay ciidamada Mareykanka inay soo afjaraan joogitaankoodii 12-ka sano ahaa, Sadr wuxuu ku tilmaamay bixitaanka ciidamada Mareykanka "madax-bannaanida Ciraaq”, isaga oo sidoo kale ammaanay kooxihii la dagaallamay ciidamada Mareykanka.

"Waxaan dalbaneynaa in ciidamada Mareykanka ay magdhow ka bixiyaan dhammaan khasaaraha ka dhashay qabsashadii dhulka Ciraaq,” ayuu yiri Sadr.

Wuxuu sidoo kale ku boorriyey dadka Ciraaq inay gudbiyaan dacwooyin sharci ah oo la xiriira khasaaraha ay sheegeen inay ka soo gaareen joogitaanka Mareykanka.

Mareykanka ayaa Ciraaq duullaan ku qaaday sanadkii 2003, kadib markii xukunka laga tuuray madaxweynihii hore Saddam Hussein. Ciidamada Mareykanka ayaa markii hore dalka ka baxay 2011, balse dib ugu soo laabtay 2014 codsi uga yimid dowladda Ciraaq, si ay uga qeyb qaataan dagaalka ka dhanka ah kooxda Daacish oo xilligaas gacanta ku dhigtay ku dhowaad saddex-meelood meel dalka.

Duullaankii Mareykanka hoggaaminayey ee 2003 ayaa muddo dheer dhaliyey muran sharci iyo mid siyaasadeed, iyadoo ciidamada isbahaysiga lagu eedeeyey tacaddiyo iyo xadgudubyo xuquuqda aadanaha.

Qiyaasaha khasaaraha nafeed ee dagaallada Ciraaq way kala duwan yihiin, iyadoo warbixino kala duwan ay tirada dhimashada ku qiyaaseen boqollaal kun ilaa in ka badan hal milyan oo dhimasho dheeri ah oo la xiriirtay dagaalka iyo saameyntiisa.

Digniin ku saabsan faragelinta dibadda

Sadr ayaa sidoo kale Mareykanka iyo dalalka deriska la ah Ciraaq ugu baaqay inay joojiyaan faragelinta arrimaha gudaha dalka.

"Tani waxay horseedi kartaa xiriirka oo la jaro iyo in loola dhaqmo si la mid ah, gaar ahaan arrimaha siyaasadda iyo fikirka, iyo in Ciraaq lagu jiido khilaafaadka gobolka,” ayuu yiri.

Waxa uu intaas ku daray in uu rajeynayo in Mareykanka uu Ciraaq ula dhaqmo si diblomaasiyadeed, isla markaana uusan "kibir” ku wajahin dowladda iyo shacabka dalkaas.

Intii uu socday joogitaankii hore ee Mareykanka ee Ciraaq, Sadr wuxuu hoggaaminayey maleeshiyadii Mahdi Army, oo markii dambe dib loogu abaabulay magaca Saraya al-Salam ama Guutooyinka Nabadda.

Kooxdaas ayaa dagaallo la gashay ciidamada isbahaysiga ee Mareykanka hoggaaminayey, ciidamada ammaanka Ciraaq iyo kooxo kale oo hubeysan.

Sadr iyo taageerayaashiisa ayaa muddo dheer isku soo bandhigay dhaqdhaqaaq waddaniyadeed oo Ciraaqi ah, iyagoo kasoo horjeeda saameynta Mareykanka iyo tan Iran ee gudaha Ciraaq.

Sadr ayaa Arbacadii sheegay in waxa ka haray Mahdi Army dib loogu qaabeyn doono urur lagu magacaabo Supporters of Imam al-Mahdi Foundation.

Wuxuu sidoo kale soo jeediyey in siyaasiyiinta hadda xilalka haya ay ka degaan jagooyinkooda, si loo helo jiil cusub oo siyaasadeed oo uu sheegay inuu "soo afjari karo musuqmaasuqa isla markaana ka shaqeyn kara dib-u-habeyn”.

Sadr ayaa mar kale ku celiyey baaqiisa ah in dhammaan hubka ku jira gudaha Ciraaq uu hoos yimaado dowladda.

Hub ka dhigista maleeshiyaadka

Arrinta hub ka dhigista kooxaha awoodda badan ee hubeysan ee Ciraaq ayaa si dhow loola xiriiriyey bixitaanka ciidamada Mareykanka.

Inkasta oo qorshaha hub ka dhigista kooxaha hubeysan markii hore lala xiriiriyey waqtiga kama dambaysta ah ee 30-ka September, Ra’iisul Wasaare Ali al-Zaidi ayaa toddobaadkii hore muddo kordhin ku sameeyey ilaa June 2027.

Kooxo awood badan oo Iran taageerto, oo ay ku jiraan Kataeb Hezbollah, Harakat al-Nujaba iyo Kataeb Sayyid al-Shuhada, ayaa horey u muujiyey inaysan diyaar u ahayn inay hubka dhigaan.

Xiisadda iyo dagaalka socda ee Mareykanka iyo Israel kula jiraan Iran ayaa sidoo kale sii adkeeyey rajada laga qabo in Tehran ay cadaadis ku saarto kooxahaas inay hubka wareejiyaan.

Hayder al-Shakeri, oo ah cilmi-baare ka tirsan barnaamijka Bariga Dhexe iyo Waqooyiga Afrika ee Chatham House, ayaa Middle East Eye u sheegay in hub ka dhigista kooxahan aysan ku xirneyn oo keliya in hubka laga qaado.

"Hub ka dhigistu waxay u baahan tahay heshiis siyaasadeed oo gudaha Ciraaq ah, hannaan lagu kalsoonaan karo oo dagaalyahannada iyo talisyadooda loogu daro hay’adaha dowladda, iyo xal loo helo awoodda siyaasadeed, dhaqaale iyo fikir ee kooxahan ay dhisteen sannado badan,” ayuu yiri.

Wuxuu sheegay in kooxaha aadka ugu dhow Iran ay si gaar ah ugu adkaan doonto inay hubka dhigaan haddii aysan jirin oggolaansho Iran ama dejin ballaaran oo xiisadaha gobolka ah.

"Haddii kale, waxaa dhici karta in hubka oo keliya loo wareejiyo hay’ad kale, halka shabakadaha iyo silsiladaha talisku ay sidii hore u sii jiraan,” ayuu yiri.