Madaxweynaha maamulka Somaliland, Cabdiraxmaan Maxamed Cabdillaahi (Cirro), ayaa ku ceeboobay wareysi lagula yeeshay magaalada Washington, kaddib markii jawaabo uu ka bixiyay macdanta, dagaalka Suudaan iyo sababta Mareykanka looga doonayo inuu aqoonsado Somaliland ay dood ka dhaliyeen baraha bulshada iyo qaar ka mid ah falanqeeyayaasha Mareykanka.Wareysiga ayaa ka dhacay machadka Hudson Institute 14-kii September, xilli Cirro uu booqasho ku joogo Mareykanka, isaga oo olole ugu jira sidii maamulka Somaliland uu Washington uga heli lahaa aqoonsi. Hudson Institute ayaa kulanka ku tilmaamay mid looga hadlayay doorka Somaliland ee Geeska Afrika iyo muhiimaddeeda istaraatiijiyadeed.

Warbaahinta Middle East Eye ayaa sheegtay in qaabka uu Cirro uga jawaabay qaar ka mid ah su’aalaha uu dhaliyay dhaleeceyn, gaar ahaan xilli Somaliland ay isku dayeyso inay Mareykanka ka dhaadhiciso inay leedahay muhiimad dhinacyada amniga, dekedaha iyo khayraadka dabiiciga ah.

Markii la weydiiyay nooca macdantaas, Cirro ayaa qoslay, isagoo sheegay inuusan ahayn khabiir cilmiga dhulka ah. "Ma garanayo… malaha wax walba,” ayuu yiri.

Jawaabta ayaa timid xilli Cirro uu wareysi kale oo uu siiyay warbaahinta Semafor ku sheegay in Somaliland ay Mareykanka u soo bandhigi karto dekedo, macdan iyo suurta-galnimada wada-xaajood ku saabsan marin ama adeegyo militari, iyadoo beddelkeeda dooneysa xiriir dhow iyo aqoonsi. Semafor ayaa sidoo kale sheegtay in Cirro uu Washington u sheegay in "wax bilaash ah” aan la bixineyn. 

Hase yeeshee, tani ma ahayn markii ugu horreysay ee Cirro uu ka hadlo macdanta Somaliland. Bishii February, wuxuu Reuters u sheegay in deegaanku leeyahay macdan, shidaal iyo gaas, isagoo si gaar ah u xusay sheegashada ku saabsan kaydka lithium-ka.

Su’aal kale oo dood dhalisay ayaa ku saabsaneyd dagaalka Suudaan.

Markii wax laga weydiiyay colaaddaas, Cirro wuxuu sheegay in Suudaan ay "aad uga fog tahay” Somaliland, isagoo masaafadeeda tusaale ahaan ula barbar dhigay Venezuela.

Dagaalka Suudaan ayaa tan iyo 2023 u dhexeeya ciidamada dowladda iyo xoogagga Rapid Support Forces (RSF), waxaana colaadda ku lug leh dano iyo loollan goboleed oo ballaaran. Imaaraadka Carabta ayaa lagu eedeeyay inuu taageero RSF, balse Abu Dhabi ayaa beenisay eedeymahaas.

Cameron Hudson, oo hore uga tirsanaa hay’adaha dowladda Mareykanka kana faallooda arrimaha Afrika, ayaa si adag u dhaleeceeyay muuqaalka Cirro ee kulanka, isaga oo qoraal uu soo dhigay X ku tilmaamay hoggaamiye ay ku adkaatay inuu gudbiyo farriintii uu Washington ula yimid.

Dood kale ayaa dhalatay markii Cirro la weydiiyay sababta Mareykanku u aqoonsan lahaa Somaliland.

"Ficil ahaan Somaliland kama mid aha Soomaaliya,” ayuu yiri, ka hor inta uusan raacin: "Mabda’a ahaan Somaliland waxay ka mid tahay Soomaaliya.”

Israel ayaa 26-kii December 2025 noqotay dalkii ugu horreeyay ee xubin ka ah Qaramada Midoobay ee si rasmi ah u aqoonsada Somaliland, tallaabadaas oo dowladda Soomaaliya si xooggan u cambaareysay, kuna tilmaantay mid ka dhan ah madax-bannaanideeda iyo midnimada dhuleed.

Tan iyo markaas, Somaliland waxay sare u qaaday dadaallada ay ugu jirto inay hesho aqoonsiyo kale, iyadoo Mareykanka u aragta bartilmaameedka ugu muhiimsan.