Golaha ayaa sheegay in weerarka uu walaac weyn ka dhaliyay eedeymaha la xiriira in diyaarado aan duuliye lahayn oo taageero shisheeye heysta ay ku lug lahaayeen weerarka oo Jeneraal Mahad iyo xubno ka tirsan qoyskiisa ay ku dhaawacmeen.

Golaha Mustaqbalka ayaa xusay in Jeneraal Mahad horay xilka looga qaaday, isla markaana loo xiray khilaaf siyaasadeed oo lala xiriiriyay xiriirka qoys ee uu la leeyahay Madaxweynaha Koonfur Galbeed ee hore, Cabdicasiis Laftagareen. Golaha ayaa sheegay in, sida ay og yihiin, Jeneraal Mahad aan lagu soo oogin ama lagu soo eedeyn wax dambi ah oo la xiriira falal argagixiso ama dembi kale.

Golaha ayaa sidoo kale walaac ka muujiyay hadalka Dowladda Federaalka Soomaaliya ee ah in aysan mas'uul ka ahayn weerarka, iyadoo dowladda ay sheegtay in qaraxa uu ka dhashay walxaha qarxa oo lagu diyaarinayay gudaha guriga.

"Eedeynta noocan ah waxay abuuri kartaa tusaale khatar ah,” ayuu Golaha Mustaqbalka ku sheegay war-saxaafadeedkiisa, isaga oo ka digay in mustaqbalka dadka siyaasadda ka soo horjeeda lagu weerari karo, kaddibna mas'uuliyadda lagu saari karo walxaha qarxa oo lagu sheegay inay guryahooda yaalleen.

Golaha ayaa dalbaday baaritaan madax-bannaan oo degdeg ah si loo ogaado waxa dhab ahaan ka dhacay Doolow, cidda amartay ama suuragelisay weerarka iyo in awood ciidan oo shisheeye lagu lug lahaa.

Sidoo kale, Golaha Mustaqbalka wuxuu ugu baaqay dhammaan saaxiibbada caalamiga ah ee Soomaaliya inay hubiyaan in hubka, diyaaradaha aan duuliyaha lahayn, xogaha sirdoonka iyo taageerada la siiyo Soomaaliya si loola dagaallamo Al-Shabaab aan loo adeegsan khilaafaadka siyaasadeed ee gudaha dalka.

Golaha ayaa sheegay in taageerada Soomaaliya aysan la micno ahayn taageerada xukuumad ama shaqsi xil haya, isagoo ku adkeystay in awoodaha la siiyo dowladda loogu talagalay la-dagaallanka Al-Shabaab, ayna tahay in aan loo adeegsan mucaaradka siyaasadeed.